Paglipad sa ere (Sa eroplano, Bidyo 2)

PAGLIPAD SA ERE

(SA EROPLANO, BIDYO 2)

anong lapad din ng runway ng paliparan

maya-maya lang, eroplano'y umandar na

pinagmasdan ko ang buong kapaligiran

pag-usad namin ay binidyuhang talaga

wow, natiyempuhan ko ang mismong paglipad

hanggang kalupaa'y lumiit sa paningin

sa tabi ng bintana'y naupong kaypalad

habang naririnig ang pagaspas ng hangin

iyon ang aking unang pagbidyo sa ere

nakabibingi ang katahimikan doon

bigla'y makaririnig na di ko masabi

baka sa hangin kaya nangyayari iyon

buti't hangin ay di gaanong nagngangalit

lalo't may balitang may parating na bagyo

at ninamnam ko na lamang ang bawat saglit

nakapagbidyo rin ng dalawang minuto

- gregoriovbituinjr.

05.31.2023

* ang bidyo ay kuha ng makatang gala sa Mactan airport tungong NAIA, 05.31.2023

* mapapanood ang bidyo sa kawing na: https://fb.watch/l0chDSp8Sd/

Paglalagay ng gamit (Sa eroplano, Bidyo 1)

PAGLALAGAY NG GAMIT

(SA EROPLANO, BIDYO 1)

noong makalampas na ang katanghalian

nakapasok na rin kami sa eroplano

animan ang upuan sa bawat hilera

habang nadarama sa puso'y pananabik

minasdan ko ang tanawin sa paliparan

buti't sa tabi ng bintana nakapwesto

tiyak, maya-maya lang kami'y lilipad na

kaya nakita sa kwaderno'y sinatitik

iginala ang mata sa kapaligiran

may naglalagay ng gamit ng pasahero

binidyuhan ang pagsalansan ng maleta

sa kumbeyor na sa ilalim isiniksik

ay, isang tagpo iyon ng pagtutulungan

upang bagahe'y mapag-ingatang totoo

marahil ay sapat-sapat ang sahod nila

nang pamilya nila'y di sa gutom tumitik

- gregoriovbituinjr.

05.31.2023

* ang bidyo ay kuha ng makatang gala sa Mactan airport tungong NAIA, 05.31.2023

* mapapanood ang bidyo sa kawing na: https://fb.watch/k-XRqJBcjl/ 

Pasalubong

PASALUBONG

alas-singko pa lang, kami'y nasa airport na

para sa flight ng alas-syete ng umaga

subalit anong tagal kong maghihintay pa

flight ay nalipat ng alas-dose y medya

nasa loob na't ayoko na ring lumabas

ramdam ko pa'y antok, minuto'y pinalipas

sa upuan nakatulog, dama ang puyat

ngunit gising ang diwa, di dapat malingat

maya-maya pa'y naglibot, nakakagutom

bumili ng makakain at pasalubong

ah, pantawid-gutom din ang biskwit na iyon

buti't may tubig akong nadala rin doon

ako'y pumasok na rin bandang alas-onse

dala kong tubig ay na-detect, at sinabi

ng gwardya, iwan ko raw ang tubig sa tabi

tubig ko'y ininom at iniwan ang bote

buti't may Jollibee, makakakain na rin

kaya di na lang biskwit, may ulam na't kanin

di dapat magutom, ito ang laging bilin

sa sarili't baka tiyan ay pilipitin

- gregoriovbituinjr.

05.31.2023

Pagtungo sa airport

PAGTUNGO SA AIRPORT

kay-agang gumising upang maglakbay na pauwi

nag-ayos, naligo, nagbihis, sadyang nagmadali

mabuting maagap upang pag-alala'y mapawi

pagkasabik ba o lungkot ang sa puso'y naghari

doon nga sa kwarto'y talaga akong tinawagan

alas-kwatro ng madaling araw, gising na naman

nasa hulatanan o lobby naghihintay ang van

upang sumundo sa amin patungong paliparan

tatlo kaming umalis na kasamang nagsidalo

sa tatlong araw na asembliyang ginanap dito

sa Mactan, Cebu, sa lalawigan ni Lapulapu

hinggil sa paksang hustisya't karapatang pantao

madaling araw yaong iskedyul naming nauna

kaya kagabi pa lang ay talagang kumain na

habang mamaya pa magsisialisan ang iba

na bago lumisan ay may almusal o meryenda

uuwi kaming dala ang nangyaring pag-uusap

upang dalhin sa kanya-kanyang lugar ang naganap

na sa paglaon itayo ang lipunang pangarap

na walang nagsasamantala at nagpapahirap

- gregoriovbituinjr.

05.31.2023

* kuha ang bidyo ng madaling araw ng 05.31.2023

* may mapapanood na munting bidyo sa: https://fb.watch/kXnE2YUsA7/

Danggit

DANGGIT

inalmusal ko'y danggit, kaysarap
ng pagkapritong aking nalasap
na para bang ako'y nangangarap

lalo't sikat nga ito sa Cebu
at ngayon ay nakarating dito
kaya hinanap itong totoo

pagtungo sa Cebu'y ikalawa
matapos ang Climate Walk ang una
siyam na taon ang lumipas na

sa airport lamang nagtungo roon
at pa-Maynila na kami noon
di man lamang nakapaglimayon

ngayon sa Cebu nakapagdanggit
sana sa asngal ay di sumabit
salamat sa sarap na kaylupit

- gregoriovbituinjr.
05.30.2023

* asngal - ngalangala

* ang makatang gala ay dumalo sa isang asembliya ng karapatang pantao sa Mactan, Cebu mula Mayo 28-30,2023

Bente pesos na bigas, trenta pesos na kanin

BENTE PESOS NA BIGAS, TRENTA PESOS NA KANIN

bente pesos na bigas / ang pangako sa atin

pangako sa eleksyon / ay di na ba kakamtin?

boladas lang ba iyon / na pang-uto sa atin?

habang trenta pesos na / ang isang tasang kanin

ito ba'y isang aral / sa dukhang mamamayan?

mga trapo'y nangako / sa turing na basahan?

upang manalo lamang / sa nangyaring halalan

nabulag sa pangako / ng trapo't mayayaman?

ay, ano nang nangyari? / nagpabola't nabola?

matagal nang pag-iral / ng trapong pulitika?

kung dati limangdaang / piso raw bawat isa

ngayon naman ay naging / libo na, totoo ba?

trenta pesos ang kanin, / bente pesos na bigas

ang pangako sa masa, / pangako ba ng hudas?

na sadyang ipinako? / kamay kaya'y maghugas?

masabunan pa kaya? / at sa puwet ipunas?

- gregoriovbituinjr.

05.29.2023

Ang mga awitin ng Sining Dilaab

ANG MGA AWITIN NG SINING DILAAB

ang mga awitin / ng Sining Dilaab
ay talagang dama / at talab na talab
sa puso't diwa ko'y / sadyang nagpaalab
awiting para bang / dyamante't dagitab

magpatuloy tayo / sa pakikibaka
para sa human rights, / para sa hustisya
maraming salamat / sa alay n'yong kanta
para sa obrero, / sa dukha, sa masa

taas-kamao pong / ako'y nagpupugay
sa Sining Dilaab / sa kantang kayhusay
tapik sa balikat / sa di mapalagay
tanging masasabi'y / mabuhay! Mabuhay!

- gregoriovbituinjr.
05.28.2023

* ang Sining Dilaab ay grupo ng mang-aawit na nakabase sa Cebu
* ang dilaab ay Cebuano sa liyab, lagablab    

Chorizo de Cebu

CHORIZO DE CEBU

inalmusal ko'y Chorizo de Cebu

pagkat ispesyal na putahe ito

kaya agad na ito'y tinikman ko

lalo't pangalwang beses ko lang dito

agad ngang nakahalina sa akin

ang pangalan pa lang nitong pagkain

soriso, ah, mukhang masarap man din

at piniling ito'y matikman ko rin

kinunan muna ito ng litrato

na nakasulat: Chorizo de Cebu

minsan lang kasing mapapunta rito

kaya aking ninamnam ang soriso

aba'y malasa kaysa karaniwan

at tamang-tama pa sa lalamunan

nadama kong nabusog din ang tiyan

pagkat anong sarap, talaga naman

- gregoriovbituinjr.

05.28.2023

* sinulat ng makatang gala sa ikalawa niyang punta sa Cebu

Pagdatal sa Mactan

PAGDATAL SA MACTAN

at nakarating din sa Mactan tangan ang bagahe

buti'y di Japan na kailangan ng pasaporte

dadalo sa asembliya, dapat may masasabi

hinggil sa mga isyung ang dama'y di mapakali

narating ko na rin ang lupain ni Lapulapu

kung saan si Fernando Magallanes ay natalo

ito ang aking ikalawang pagpunta ng Cebu

una'y noong Climate Walk nang pauwi nang totoo

upang daluhan ang malaking asemliya roon

ng mga prinsipyadong karapatan yaong misyon

na pinag-uusapan ang isyung napapanahon

at panawagang hustisya ng namatayan noon

mga isyu ng mga nawalan ng katarungan

at usaping dapat pag-isipan at pag-usapan

na sistema'y babaguhin kung kinakailangan

at hustisyang panlipunan ay ipinaglalaban

- gregoriovbituinjr.

05.28.2023

* litratong kuha ng makatang gala, 05.27.2023

Paalala sa kalinisan

PAALALA SA KALINISAN

madaling unawain kung uunawain nila

ang paalala sa mga sa opis bumisita:

"Huwag mag-iwan ng anumang uri ng basura,"

at saka, "dumi at kalat sa ating opisina"

magwalis

mag-imis

maglinis

mag-isis

kailangan pa talaga ng paalalang iyon

upang opisina'y iwanang malinis paglaon

habang nakikibaka't tinutupad yaong misyon

ang kalinisan din ng ginagalawan ay layon

- gregoriovbituinjr.

05.27.2023

Ang kuting na ayaw pasusuhin

ANG KUTING NA AYAW PASUSUHIN

nakauna na ang ibang kapatid

pinalipat ang may batik na itim

palipat-lipat, di mapatid-patid

di na makasuso ang isang kuting

tila tulog na ang inahing pusa

o nakapikit lang habang abala

na pasusuhin ang mga anak nga

na agawan sa pagsuso talaga

inaalis ng kapatid ang ulo

ng isang kuting na di makadede

lumipat naman sa kabila ito

ganoon din, di pa rin makadede

ibang kapatid niya't anong kulit

na gustong ang makasuso'y sila lang

hanggang kanyang sarili'y ipinilit

ayaw rin niyang siya'y maisahan

sige, karapatan mo'y igiit mo

kapatid ka namang dapat dumede

ipagtagumpay mo rin ang pagsuso

kaysa magutom ka't mauhaw dine

- gregoriovbituinjr.

05.26.2023

* mapapanood ang bidyo sa: https://fb.watch/kMvUNFH10U/

Paggising sa umaga

PAGGISING SA UMAGA

paggising sa umaga'y nag-inat

inimis ang inunan kong aklat

kagabi'y umulan at mahamog

buti't tuhod ay di nangangatog

mumog, hilamos, handa'y almusal

barakong mainit at pandesal

karaniwang tagpo pagkagising

mag-eehersisyo, magdi-dyaging

ihahanda ang buong sarili

para sa gawain hanggang gabi

mangangalap ng mga balita

at isyu ng dukha't manggagawa

magsusulat ng mga sanaysay

sinong bibigyan ng pagpupugay

mga kuting ay kukumustahin

pakakainin, paiinumin

at maglalakad muli sa lubak

nanamnamin ang paksa sa utak

na isusulat agad sa papel

titipain naman sa kompyuter

- gregoriovbituinjr.

05.26.2023

Ragasang tubig sa biglang pag-ulan

a

RAGASANG TUBIG SA BIGLANG PAG-ULAN

tumigil ako sa isang lansangan

kung saan tao'y may masisilungan

lalo't bigla ang pagbagsak ng ulan

nakisilong sa isang paaralan

magpapasa sana ako ng akda

sa isang manunulat na dakila

di na natuloy ang inaadhika

lampas-oras, baka siya na'y wala

oras nga'y pinagsikapang habulin

lalo na'y kayhaba ng lalakarin

biglang umulan, di na kakayanin

tila ba ako'y nasa isang bangin

pinagmasdan ko na lamang ang kanal

ragasa ang tubig tungong imburnal

walang payong kaya natitigagal

ako'y basang sisiw at nangangatal

- gregoriovbituinjr.

05.25.2023

* mapapanood ang bidyo sa: https://fb.watch/kL85cDnujH/

Wrestling ng mga kuting

WRESTLING NG MGA KUTING

naglalaro muli ang mga kuting

animo sila'y mga nagre-wrestling

balibag dito at doon, ang galing

o baka naman nagla-loving-loving

sa galaw ng kanilang buntot pa lang

alam mong sila'y nagkakatuwaan

masaya lang silang naghaharutan

palibhasa'y mga bata pa naman

akala mo ba, kaya mo ako, ha?

aba'y sabi ng isa sa kanila

palakasan, sinong agad tutumba

sige nga, ang sagot naman ng isa

baka naman sila'y nag-eensayo

na pagbabalibag daw ba'y paano

baka raw may dagang malaki, naku

sa pagdepensa'y dapat nang matuto

nagkatuwaan ang mga alaga

habang sa kanila'y nakatunganga

sa panonood pa lang ay may tuwa

sa puso, bagamat di mo halata

- gregoriovbituinjr.

05.25.2023

* ang bidyo ay mapapanood sa: https://fb.watch/kK-uulwtIh/

Ulan

ULAN

dinig ang nag-uumpugang hangin

habang tikatik ay lumalakas

naglalabanan sa papawirin

sa bawat nilang pagwawasiwas

habang ako'y naroong napatda

at nakatitig lang sa kawalan

hinihintay ang kanyang pagtila

upang makalusong na sa daan

aking diwata'y biglang tumawag

magkita kami sa ganyang pook

agad tumalima, lakad, sagsag

baha na, habang may inaarok

ay, sa mutya'y hindi makahindi

ang ulan naman ay titila rin

siyang tagapagdala ng binhi

na sinasabi'y dapat kong dinggin

- gregoriovbituinjr.

05.24.2023

* mapapanood ang bidyo sa: https://fb.watch/kJTFjcu4dG/

Awit at gitara

AWIT AT GITARA

nais kong umawit, tumugtog ng gitara

kumatha ng tulang gagawin nating kanta

karaniwang pangarap ngunit naiiba

na pinapaksa'y pagbabago ng sistema

serbisyo ay huwag namang gawing negosyo

pasensya muna kung di maganda ang tono

ang mahalaga, inaawit ay totoo

awiting may malasakit sa kapwa tao

gigitarahin ko'y pangkaraniwang paksa

dapat bayarang tama ang lakas-paggawa

dapat may pampublikong pabahay sa dukha

i-regular, di kontraktwal, ang manggagawa

itayo natin ang makataong lipunan

gawing para sa tao ang bawat awitan

ang ating kalikasan ay pangalagaan

huwag negosyohin ang pagsilbi sa bayan

- gregoriovbituinjr.

05.24.2023

Bawal tumawid

BAWAL TUMAWID

paano ka tatawid sa daan

kung may tulay nga, kaylayo naman

nais mong kumabilang lansangan

subalit di maaari iyan

may nakalagay: Bawal Tumawid

aba'y maliwanag ang pabatid

at baka pagmultahin kang pilit

kung alam mo nang sala'y naggiit

tulay ay tiyagaing lakarin

kapara ng panliligaw mo rin

sa dilag na nais asawahin

hanggang oo niya'y iyong kamtin

tawirin mo ang daan ng buhay

na ang pakiramdam ay palagay

tumawid sa naririyang tulay

nang kabila'y marating mong tunay

- gregoriovbituinjr.

05.24.2023

Kalamansi dyus

KALAMANSI DYUS

sampung pisong balot ng kalamansi

ang binili ko habang nililimi

ang kalusugan upang mairaos

kaya nagtimpla ng kalamansi dyus

hindi ko na nilagyan ng asukal

basta ininom lang nang magminindal

dahil nais kong lumakas talaga

nang sa sakit ay mayroong depensa

kalamansi dyus ay laging timplahin

bagamat hindi aaraw-arawin

pampalusog pa ito't pampalakas

nang sa mga sakit ay makaiwas

ah, salamat sa akin ay nagpayo

baka sakit ko'y tuluyang maglaho

- gregoriovbituinjr.

05.23.2023

Patalastas ng LPG

PATALASTAS NG L.P.G.

maraming paskil ng binebentang L.P.G.

gawa ng tagapaskil nga'y pinagbubuti

kaliwa't kanan, ingat, huwag lang salisi

basta may pinto't geyt, paskil agad, ang sabi

tingni, iba't iba ang kumpanyang nagpaskil

sa pagpapaligsaha'y tila nanggigigil

liquified petroleum gas ba ang napipisil?

upang sa pagluluto'y wala nang hilahil?

ganyan ang kapitalismo at kumpetisyon

nais nilang ang katunggali ay malamon

habang kami'y paano makakain ngayon

magluluto upang pamilya'y di magutom

gas istob na three burner ang gamit na kalan

tangke ng L.P.G. basta walang kalawang

iyan ang gamit sa mas maraming tahanan

kahit dukhang nais ng buhay na maalwan

- gregoriovbituinjr.

05.23.2023

Nilalarong buntot

NILALARONG BUNTOT

nilalaro ng kuting ang buntot ng ina

at ang ina'y ginalaw-galaw pang talaga

nililibang-libang niya ang anak niya

na kung panonoorin mo'y kasiya-siya

minsan lang makita ang ganyang paglalaro

binidyo ko nang larawan ay di maglaho

upang maibahagi ang ganitong tagpo

upang mapanood ninyo ang kuhang buo

isang buwang higit pa lang ang mga kuting

hayaan muna silang maglaro't maglambing

pagkatapos kumain sila'y nahihimbing

at pag nagutom lamang muling gumigising

panoorin natin ang nilalarong buntot

baka may aral silang dito mahuhugot

bilis ng pagdakma at bilis ng pagkalmot

baka nga gayon, di na ako nagbantulot

- gregoriovbituinjr.

05.23.2023

* ang bidyo ay mapapanood sa: https://fb.watch/kHVCTHk1_1/    

Yantok

YANTOK

binebenta ang matigas na yantok sa palengke

iniisip kong kahit dalawa nito'y bumili

at magpraktis muli ng arnis sa araw at gabi

pag-eensayo'y pampalakas ng katawan, sabi

sa istoryang Mulawin, gamit ito ng may bagwis

laban sa mga Ravena, gagamiting mabilis

kay Sangre Danaya na magaling naman sa arnis

sa Engkantadya, ang tawag nila rito'y balangis

arnis ay lokal na martial art o sining panlaban

na itinuturo sa pampublikong paaralan

kahit tanod ng barangay, ito'y pinag-aralan

bilang pandepensa sa mga gago at haragan

bagamat di ko naitanong magkano ang yantok

maganda nang mayroon nito, ang aking naarok

kung magkabiglaan, may kukunin kang nakasuksok

sa bahay upang makadepensa kung may pagsubok

- gregoriovbituinjr.

05.22.2023

Bilin ng inang pusa sa panganay

BILIN NG INANG PUSA SA PANGANAY

bilin ng inang pusa'y agad pinabatid

sa panganay, mahalagang mensahe'y hatid:

"Huwag mong pabayaan ang magkakapatid!

Huwag hayaang sila't kung saan mabulid!"

ang bilin ng ina'y talagang tinandaan

ng panganay upang kanyang pangalagaan

ang natitirang mga kuting sa bakuran

lalo na't madalas maglaro sa lansangan

(inang pusa'y umalis habang binibidyo

sa kanila raw bakit ako nag-usyoso)

sa akin bilang ikalawa sa panganay

sa apat pang batang kapatid ay nagbantay

hanggang sa tahanan ako na'y napawalay

upang tupdin ang ibang tungkulin ng husay

sa tao't sa pusa man, ang payo ng ina

ay sadyang para sa kabutihan talaga

payo ng ina'y bigyang pagpapahalaga

batid na tayo'y laging nasa puso niya

- gregoriovbituinjr.

05.22.2023

* mapapanood ang bidyo sa: https://fb.watch/kGAkzm01gT/

Ang tula

ANG TULA

"Poetry is not only what I do, it’s who I am." ~ Anonymous

nakagisnan ko't kinagiliwan

ang pagbabasa ng panitikan

lalo na ang mga kathang tula

na nanunuot sa puso't diwa

noon pa ay Florante at Laura

ngayon ay Orozman at Zafira

kay Batute'y Sa Dakong Silangan

Ang Mga Anak-Dalita'y nandyan

kay Shakespeare, mga likhang soneto

tulang Raven ni Edgar Allan Poe

tula'y di lang gawain kong tunay

kundi ako rin ang tula't tulay

sa mga alon ng karagatan

at mga luha ng kalumbayan

- gregoriovbituinjr.

05.22.2023

Pagdede ng dalawang kuting

PAGDEDE NG DALAWANG KUTING

nakaupo roon ang inahin

nang maabutan ng isang kuting

tila sa gatas ay gutom man din

kaya dumede na sa inahin

isang kuting pa'y biglang dumatal

na ano't tila ba humihingal

dumede rin siya, di nagtagal

habang ina'y tila natigagal

ganyan madalas ang buhay nila

pag walang huling daga ang ina

na sila'y padede-dede muna

sabagay, sila nama'y bata pa

mga kuting, kayo'y magpalakas

at sa ina'y uminom ng gatas

habang akin namang nawawatas

pag-ibig ng ina'y sadyang wagas

- gregoriovbituinjr.

05.21.2023

* mapapanood ang bidyo sa: https://fb.watch/kFvN8wzsWV/    

Inadobong kangkong

INADOBONG KANGKONG

binili ko'y santaling kangkong, bente pesos

pag-uwi'y pinitas muna ang mga talbos

pinili yaong mga sangang maninipis

at akin itong ginayat ng maliliit

bawang at sibuyas ay ginisa ko muna

pati munting sanga ng kangkong ay sinama

nang sumarap ang amoy, saka inihalo

ang handang isang tasang tubig, suka't toyo

murang gulay, pampalakas pa ng katawan

bagamat niluluto lang paminsan-minsan

kanina'y pananghalian namin ni misis

mura man, basta sa gutom ay di magtiis

adobong kangkong, kaysarap na lutong bahay

buti't pagluluto'y akin ding napaghusay

nang makakain, nagpahinga na't nabusog

sa inulam naming talagang pampalusog

- gregoriovbituinjr.

05.20.2023

* mapapanood ang bidyo sa: https://fb.watch/kErMKW--Vj/

Si Mingming, anak ni Muning

SI MINGMING, ANAK NI MUNING

isa siya sa dalawang naunang anak

ni Muning, bukod sa anim pang bunsong anak

kaya nga walo na silang magkakapatid

na ilan ay di ko na makita, di batid

ang anim ay naging lima, ngayon na'y apat

ngunit sa tabi-tabi lang sila nagkalat

marahil 'yung iba'y may ibang natambayan

at doon nakahanap ng makakainan

ito namang si Mingming, may batik na itim

tambay lang sa tapat kahit gabing madilim

mas malaki na siya kaysa kanyang ina

isa sa bunso pa'y halos kamukha niya

maraming tula hinggil sa kanila'y pakay

at mailarawan din sila sa sanaysay

may litrato na, may bidyo pa, at may kwento

ano bang buhay nilang aking napagtanto

minsan, pag may ulam na isda't di naubos

pasalubong na ang ulo't balat ng bangus

buti't di nila kinakalmot ang tulad ko

baka gusto rin nilang haplusin sa ulo

- gregoriovbituinjr.

05.20.2023

* mapapanood ang bidyo sa: https://fb.watch/kEprdW5U6g/    

Sa bawat pag-usad ng pluma

SA BAWAT PAG-USAD NG PLUMA

saan nga ba patungo ang bawat pag-usad

niring plumang mga kwento ng kapwa'y hangad

pagkalbo ba sa kabundukan ay pag-unlad?

pagmimina'y nakabuti nga ba sa lumad?

samutsari ang sangkaterbang mga isyu

nais pa ng ilan na magnukleyar tayo

aral ba ng Fukushima'y di nila tanto?

o bulsa lang nila'y patatabaing husto?

umunlad daw tayo habang kayraming dukha

umasenso raw ang bansa ng maralita

lakas-paggawa'y di pa mabayarang tama

ang krisis pa sa klima'y sadyang lumulubha

ginagalugad nila ang ibang planeta

kung tulad ng Daigdig mabubuhay sila

gayong sariling planeta'y sinisira pa

pulos digmaan, puno ng plastik, basura

nasaan na nga ba ang pagpapakatao?

at ang pakikipagkapwa nating totoo?

na habilin sa atin ng henyong Jacinto

sa kanyang Liwanag at Dilim makukuro

plumang tangan sa ngayon ay nagpapatuloy

laging nagtatanong, problema'y tinutukoy:

bakit nagpapasasa ang iilang playboy?

habang nagdurusa ang kayraming palaboy?

- gregoriovbituinjr.

05.19.2023

Pagkatha ng kwento't nobela

PAGKATHA NG KWENTO'T NOBELA

pinangarap kong maging isang nobelista

kaya sa maiikling kwento nag-umpisa

ang katha ng ibang awtor ay binabasa

upang mapaghusay ang pagkatha tuwina

ang maiikling kwento ko'y nailathala

sa pahayagang Taliba ng Maralita

na publikasyon ng isang samahang dukha

kaypalad ko't nilathala nila ang akda

itong nobela'y pinagtagpi-tagping kwento

unang kabanata, ikalawa, ikatlo

anong banghay, saang lugar, anong titulo

bakit walang isang bayani ang kwento ko

bayani'y kolektibo, walang isang bida

walang Superman, Batman, Lastikman, o Darna

kundi sa bawat kwento, bayani'y ang masa

sa mapang-api't mapagsamantala'y kontra

nawa unang nobela'y aking masimulan

upang nasasaloob ay may malabasan

bida'y obrero, magsasaka, kalikasan

mithi'y matayo ang makataong lipunan

- gregoriovbituinjr.

05.18.2023

* ang pahayagang Taliba ng Maralita ang opisyal na publikasyon ng

samahang Kongreso ng Pagkakaisa ng Maralitang Lungsod (KPML)

Sa unang buwan ng mga kuting

SA UNANG BUWAN NG MGA KUTING

isinilang sila Abril Disi-Siyete

sa aming tirahan na sila nagsilaki

naglalaro, kumakain, at tumatae

sambuwan na ngayong Mayo Disi-Siyete

nilabas ko na sila sa aming tahanan

at pinatira muna doon sa bakuran

(oo, sa bakuran lang, di sa basurahan)

nang bahay ay di mangamoy at malinisan

pinagmamasdan ko sila sa paglalaro

nakadarama ng saya nang walang luho

bagamat sila naman ay nagkakasundo

maganda kung magkakapatid silang buo

nawala ang isa, at lima na lang sila

kinuha ng kapitbahay, di na nakita

gayunpaman, pag sila'y lumaki-laki pa

nawawalang kapatid ay makita sana

kaya sa unang buwan nilang mga kuting

maligayang isang buwan ang bati namin

isda man ang handa, ang tangi naming hiling

mga dagang mapanira'y inyong sagpangin

- gregoriovbituinjr.

05.17.2023

Muslak pala ang salin ng naive

MUSLAK PALA ANG SALIN NG NAIVE 

ang kanyang katangian ay payak

kung umasta't mag-isip ay muslak

nakatayong uhay sa pinitak

na di dapat gumapang sa lusak

nakita ko rin ang wastong salin

ng NAIVE na dapat kong gamitin

na dagdag-kaalaman sa atin

at maganda nang palaganapin

noon, sa pagkaunawa ko lang

ang salin ko'y walang pakialam

kahulugan pala'y walang muwang

mabuti't salita'y natagpuan

ang MUSLAK pa'y inosente't musmos

salin itong gagamiting lubos

ngayon ako na'y makararaos

upang sinasalin ay matapos

- gregoriovbituinjr.

05.17.2023

* mula sa UP Diksiyonaryong Filipino, p.803

Pagtitig sa kalangitan

PAGTITIG SA KALANGITAN

nais ko pa ring pagmasdan ang kalangitan

pag gabi na'y ang mga bituin at buwan

ulap sa kanyang pag-usad pag araw naman

o kaya'y ang mga ibong nagliliparan

ah, nais kong abutin ang mga bituin

upang itirintas sa iniibig man din

o sa ulap isakay siya't liliparin

namin ang buong daigdig at lilibutin

kadalasang inaabangan ko ang gabi

nasaan kaya roon ang Alpha Centauri?

astronomiya'y aralin, nahan ang Milky

Way o Balatas, pati ang Tatlong Babae?

alin doon ang Super Nova o ang black hole?

mga bituin ba'y nagkakabuhol-buhol?

sa teleskopyo'y magkano ang magugugol?

upang sa langit ang panahon ko'y iukol

nasaan ang Pleiades na konstelasyon?

ng pitong bituin, saan nakaposisyon

yaong pitong babaeng anak ni Apolon?

sa gabi'y hanap ko rin pati ang Orion!

- gregoriovbituinjr.

05.16.2023

Pagpapak sa ulo ng isda

PAGPAPAK SA ULO NG ISDA

binidyo ko iyon ngunit bakit nawala

na baka na-delete nang di ko sinasadya

pinapapak ng kuting ang ulo ng isda

na pag pinagmamasdan ko'y nakatutuwa

para bang sa isda siya'y gigil na gigil

baka talagang gutom na di mo mapigil

na pag naubos lang niya saka titigil

larawang iyon sa diwa'y umuukilkil

anong sarap din namang may alagang kuting

basta huwag lang sa bahay patitirahin

o kung sa bahay man, lagi mong lilinisin

ang tirahan nila nang di mangamoy man din

ibang kapatid niya'y aking napiktyuran

ang mga iyon ay may ibang kwento naman

ang kuting munang ito ang ating tulaan

sige lang, kuting, kumain ka muna riyan

- gregoriovbituinjr.

05.16.2023

Nagsosolong langgam

NAGSOSOLONG LANGGAM

ang musika'y kaysarap pakinggan

di man magkandatuto ang langgam

sa paghanap ng masisilungan

walang kasama, tila iniwan

bihirang langgam ang nagsosolo

pagkat kilos nila'y kolektibo

anong nangyari sa isang ito?

sa sinta ba'y nabigong totoo?

"hanap ko ang sintang nawawala

kaya ngayon ako'y lumuluha";

"ang hanap ko'y kapwa manggagawa

upang magpatuloy sa paggawa"

nagkudeta raw laban sa reyna

na talagang nilabanan sila

at nawalay sa mga kasama

iba'y tumakas, iba'y patay na

mga bagong akdang masusulat

paksa'y langgam na puso'y may sugat

langgam na di batid saan buhat

kaya nawalay sa kanyang pangkat

- gregoriovbituinjr.

05.16.2023

* kuha ang bidyo sa Daila Farm sa Tagaytay, Pebrero 12, 2023

* mapapanood ang bidyo sa: https://fb.watch/kyIdQKIpkY/

Sa inahing pusa ngayong Mother's Day

SA INAHING PUSA NGAYONG MOTHER'S DAY

ang Mother's Day ay di lang sa tao

pati sa inahing pusang ito

dati'y anim yaong anak nito

ngayon, lima na lang ang narito

isa'y kinuha ng kapitbahay

lima'y inaalagaang tunay

ina siyang laging mapagbantay

sa limang kuting nakasubaybay

naghahagilap lagi ng isda

para sa kanyang limang anak nga

wala pang sambuwan ang alaga

talagang mga sanggol pa't bata

alagaan mo silang mabuti

na sambuwan na sa Disi-Syete

pakakainin ko rin parati

ang limang alagang kuting dine

- gregoriovbituinjr.

05.14.2023

* may bidyo nito na mapapanood sa: https://fb.watch/kv_XKZYKWO/

Happy Mother's Day sa lahat ng nanay

HAPPY MOTHER'S DAY SA LAHAT NG NANAY

Happy Mother's Day sa lahat ng nanay

sa inyo'y taospusong pagpupugay

kayong sa amin nagpalaking tunay

kami'y binigyan ng mabuting gabay

dinala kami sa sinapupunan

sa loob ng singkad siyam na buwan

hanggang sa kami'y inyong isinilang

liwanag ng araw na'y nasilayan

binihisan n'yo kami't pinag-aral

at pinagluluto pa ng almusal

pinababaunan pa ng minindal

tiniyak lumaki kaming may dangal

pasalamat namin ay labis-labis

nariyan kayong di kami tiniis

hanggang mag-asawa kami't umalis

ay tiniyak kami'y di malilihis

gayunman, kung may nagawa mang sala

sa anumang parusa'y nakahanda

kapatawaran po'y hangad na sadya

huwag po lamang kaming isusumpa

silangan, kanluran, ilaya't hulo

kami'y pinatnubayan n'yong totoo

nawa'y manatiling malusog kayo

Happy Mother's Day pong muli sa inyo

- gregoriovbituinjr.

05.14.2023

Happy Mother's Day po, Inay!

 

HAPPY MOTHER'S DAY PO, INAY!

Happy Mother's Day po, aking Inay

ikaw na sa akin ay gumabay

sa magkakapatid pumatnubay

O, Inay, mabuhay ka! MABUHAY!

maraming salamat po sa inyo

at napalaki akong totoo

sana'y magaling nang inhinyero

lalo't kinahiliga'y numero

subalit di naman nakatapos

dahil nagpasya akong kumilos

sa uri't bayan magsilbing lubos

tulad ng pagmamahal mong taos

wala akong materyal na handog

kundi pasalamat sa paghubog

upang maging matatag, di hambog

nawa, Inay, lagi kang malusog

iba man ang landas kong pinili

kumilos upang kamtin ang mithi

ang pagsinta mo'y nananatili

O, Inay, Happy Mother's Day muli

- gregoriovbituinjr.

05.14.2023

Tahong

TAHONG

kaysarap naman ng kanyang tahong

na niluto, napakalinamnam

tagos sa puso, wala nang tanong

kung paano nilutong kay-inam

tiyak ako'y mabubusog muli

sa nilatag sa hapag-kainan

masarap na naman ang tanghali

at kami rito'y magkakainan

wala akong masabi sa luto

na tanging makakapagsalita

ay gutom na tiyang nasiphayo

at itong lalamunan at dila

salamat talaga sa tahong mo

sadyang malasa nang kinain ko

- gregoriovbituinjr.

05.13.2023

Microplastics sa Metro Manila

MICROPLASTICS SA METRO MANILA

meron na raw microplastics sa hangin

sa Metro Manila, anong gagawin

batay iyan sa ginawang aralin

na di natin dapat balewalain

ang ganyang balita'y kahindik-hindik

ang buhay na natin ay patiwarik

napalibutan na ng microplastic

baka sa ating mata'y magpatirik

may dapat gawin, di lang ang gobyerno

dapat may partisipasyon ang tao

upang malutas ang problemang ito

di madamay ang anak mo't apo ko

ang dulot nito'y panganib talaga

lalo na sa mga nasa kalsada

nagwawalis, ang vendor, motorista

pasahero, nagtatrapik, ang masa

sinong problema kung tanunging bakit

suliranin muna'y lutasing pilit

isa ang facemask sa dapat magamit

nang di na lumala pa't magkasakit

- gregoriovbituinjr.

05.13.2023

Ang mga kuting

ANG MGA KUTING

kaysarap masdan ng mga kuting

balahibo pa'y haplus-haplusin

hayaan muna silang maglaro

subukan kaya nilang maligo

subalit baka naman sipunin

at sila'y magalit lang sa akin

ah, hayaan na silang maglaro

at matutulog din pag nahapo

- gregoriovbituinjr.

05.13.2023

Ginisang sardinas

GINISANG SARDINAS

anong meron sa ginisang sardinas

upang dapat nila itong mamalas

liban sa kamatis, bawang, sibuyas

may kaiba bang lasang makakatas

ay, karaniwang ulam lamang ito

walang espesyal sa pagkaluto ko

marahil, nais kitang makasalo

habang nagkukwentuhan naman tayo

ganito'y bihira sa karinderya

pagkat ito'y lutong bahay talaga

sa binagyo man madalas makita

ay hindi naman tayo nasalanta

ah, bakit binidyo pa ng abang makata

kung hindi naman espesyal ang gawa

ulam ba'y may patak ng dusa't luha

at pagkain lamang ng mga dukha

ay, wala akong ganyang sinasabi

nais ko lang makasalo ka rine

eto ang pinggan, tikman mo na ire

tiyak na mabubusog ka rin dine

- gregoriovbituinjr.

05.12.2023

* ang bidyo ay mapapanood sa: https://fb.watch/ktGFNHVanm/

Huwag abutin ng dose oras

HUWAG ABUTIN NG DOSE ORAS

naritong dilaw na bigas mais

ay hinalo ko sa puting bigas

niluto kagabing alas-sais

nang mainin ay medyo matigas

di gaanong masarap ang lasa

baka ako'y nababaguhan lang

purong bigas mais din ay iba

subalit dapat nating subukan

ito raw kasi ay pampalusog

at panlaban sa anumang sakit

masarap pa rin naman ang tulog

bagamat nagigising malimit

alas-siyete nang mag-almusal

parang di na maganda ang kanin

tila mamasa-masa na naman

ngunit sayang, akin ding kinain

napagtanto ko sa mais bigas

upang di mapanisang totoo

di paabutin ng dose oras

ang bigas mais na niluto ko

o kaya'y kainin na kaagad

huwag maraming saing sa gabi

dahil magdamag na mabababad

ang kaning baka mapanis dine

- gregoriovbituinjr.

05.12.2023

Nagkakalantugang yantok

NAGKAKALANTUGANG YANTOK

kaysarap masdan ng yantok na nagkakalantugan

na talagang dinisenyo sa kanilang bakuran

sa tindi ng ihip ng hangin ay nagsasayawan

tila baga sila'y nagta-chacha sa kakahuyan

o kaya naman ay may nag-eensayo ng arnis

dahil sa nagkalantugang yantok na maninipis

na kung pagmasdan mo'y talagang pinagbigkis-bigkis

na disenyo'y pantay, magkahilera, walang mintis

tunog din ay marakas sa nangangaroling noon

marahil para rin maitaboy ang mga ibon

dahil sa maraming tanim na halamang naroon

tulad ng bambanti o scarecrow na tawag doon

O, iyong damhin ang kaygandang indayog at himig

ng mga yantok na kalantog ay dinig na dinig

sabay sa ihip ng hangin at huni ng kuligkig

sa mga nerbyoso marahil ay nakatutulig

kaya nagkalantugang yantok ay aking binidyo

nang madama't mapakinggan mo rin ang mga ito

ramdam mo ang kapayapaan sa mundong magulo

at nanaising magpahinga sa katabing kubo

- gregoriovbituinjr.

05.12.2023

* kinunan ang bidyo sa Daila Farm sa Tagaytay nang minsang magawi roon, Pebrero 12, 2023

* ang bidyo ay mapapanood sa: https://fb.watch/ktiGxuVsB6/

Alin ang mas mahal?

ALIN ANG MAS MAHAL?

alin ang mas mahal dito sa dalawa?

dami ba o bigat ang mas mahalaga?

itong kapeng 4-in-1 na 15 grams ba?

o ang kapeng 3-in-1 na 20 grams na?

mabigat na timbang o maraming laman?

binili ni misis, presyo'y di ko alam

20 grams ba na limang gramo ang lamang?

o ang 4-in-1 na mas lamang sa bilang?

ang 4-in-1, apat na klase ang meron

ngunit magaan kaya mas mura iyon

ang 3-in-1 ay tatlong klase man yaon

ay mas mabigat kaya mas mahal iyon

iyan ay teorya ko lang, di pa presyo

mabigat na timbang ang mas mahal dito

kung masasabi ni misis kung magkano

saka sabihing teorya ko'y totoo

buting ito'y batid upang sa susunod

ay alam na ang bibilhin pag sumahod

ang pag-usapan ito'y nakalulugod

lalo sa obrerong madalas ang kayod

- gregoriovbituinjr.

05.11.2023