SA KAARAWAN NI CHERPIN, EDAD 7
flash card ng mga bayani at isang aklat
ang regalo sa may kaarawang pamangkin
namin ni misis, pitong taon na ang edad
bata pa subalit may talino nang angkin
sa paaralan baka sa kanya'y itanong
mga bayani ba natin ay sino-sino?
nagkarerahan sina kuneho at pagong
nagwagi si pagong, bakit kuneho't talo?
makabuluhang regalo'y aming inalay
sa pamangking nagdiriwang ng kaarawan
bagamat munti man ang aming nabigay
dito'y marami na siyang matututunan
bagamat edad pa lang niya'y pitong taon
mga bayani'y magandang ipakilala
sa pabula ay mabatid ano ang leksyon
at maging gawi na niya ang pagbabasa
- gregoriovbituinjr.
03.05.2024
Walang komento:
Mag-post ng isang Komento