Takbo!!! - tula ni Victor Vargas

Takbo!!!
Tula ni Victor Vargas

Tatlong daang piso lang ang registration
Takbo para sa Kalikasan, takbo!
May libre pang pang-jogging na sando
Takbo para sa Kalikasan, takbo!
Bottomless ang health drink for more energy, libre
Takbo para sa Kalikasan, takbo!
Mga artista, pulitiko, celebrity kasali
Takbo para sa Kalikasan, takbo!

Kailangan na daw sagipin ang ilog
Takbo para sa Kalikasan, takbo!
Iligtas ang mga lawa at isalba ang mga kalbong bundok
Takbo para sa Kalikasan, takbo!
Sa mga tarpulin, pahayagan at sa internet naka-anunsyo
Takbo para sa Kalikasan, takbo!
Isang takbuhan lang makapagtatayo na tayo ng isang foundation o NGO
Takbo para sa Kalikasan, takbo!

Tirik ang sinag ng araw wala nang masilungan
Takbo para sa Kalikasan, takbo!
Nagkakandamatay ang mga puno sa bundok
Takbo para sa Kalikasan, takbo!
Binubuldoser ang mga burol at kabundukan
Takbo para sa Kalikasan, takbo!
Tinatabunan, winawasak ang karagatan
Takbo para sa Kalikasan, takbo!

Ilang araw nang walang tigil ang ulan
Takbo para sa Kalikasan, takbo!
Landslide, mudslide, baha lagpas-tao
Takbo para sa Kalikasan, takbo!
Nagko-collapse ang mga dike, dam at tabing-ilog
Takbo para sa Kalikasan, takbo!
Bagyo at hanging habagat nagpapatintero
Takbo para sa Kalikasan, takbo!

Heavy metalikong lason sa lahat ng dako at lupalop
Takbo para sa Kalikasan, takbo!
Sa mga lawa, ilog, bukal, sa tubig nakahalo
Takbo para sa Kalikasan, takbo!
Gulay, prutas, hayop, isda ay kargado
Takbo para sa Kalikasan, takbo!
Tubig na inumin nating lahat ay kontaminado
Takbo para sa Kalikasan, takbo!

Tingga sa mga abubot at plastik na produkto
Takbo para sa Kalikasan, takbo!
Pampaputing cream at lotion may arseniko
Takbo para sa Kalikasan, takbo!
Asoge at cadmium sa mga laruan ng anak mo
Takbo para sa Kalikasan, takbo!
Sa langis ng makina at usok ng tambutso
Takbo para sa Kalikasan, takbo!

Ayan na ang higanteng alon, tsunami
Takbo para sa Kalikasan, takbo!
Mga dambuhalang bagyo dala-dala’y storm surge
Takbo para sa Kalikasan, takbo!
Mga bahay, pabrika, pananim, plantang nukleyar inanod
Takbo para sa Kalikasan, takbo!
Dagat at isda ay nalason ngayo’y radyoaktibo
Takbo para sa Kalikasan, takbo!

Takbo para sa Kalikasan, takbo!
Para sa Kalikasan, takbo!
Para sa Kalikasan, takbo!

[Wed. Apr.9-10,2014 sa Kalye Zafiro, San Andres at kahabaan ng SLEX - Wed. Apr. 23 sa Lecheria,Calamba]