APAT NA BATAS SA EKOLOHIYA NI BARRY COMMONER
ni Gregorio V. Bituin Jr.
15 pantig bawat taludtod
may apat na batas sa ekolohiyang pamana
si Barry Commoner na kilalang ekolohista
paglimiang mabuti ang mga sinabi niya
tiyak unawa mong ang buhay sa mundo'y kayganda
una, lahat ng bagay sa mundo'y magkakaugnay
may hininga, kumakain, umiinom, may buhay
ang sakit ng kalingkingan, dama ng buong kamay
di ka man nalasing, kumpare mo ang sumusuray
ikalawa, bawat bagay ay pupunta kung saan
walang nawawala, kundi natatransporma lamang
mula yelo'y naging tubig, ulap ay naging ulan
buto'y naging puno, puno'y sibak, naging tahanan
ikatlo, alam ng kalikasan anong mabuti
upang buhay ng bawat isa sa mundo'y umigi
walang kandilang magulang ang maya't kalapati
ngunit buhay, kumakain, wala kang masasabi
walang libreng pananghalian yaong ikaapat
lahat ay may dahilan kung bakit nariyan lahat
dapat kang gumawa upang makakuha ng sapat
di dapat tumunganga ka lang di ka mabubundat
Walang komento:
Mag-post ng isang Komento