Pahinga sa hangganan ng Quezon at Laguna

PAHINGA SA HANGGANAN NG QUEZON AT LAGUNA

pagsapit ng Kilometer Sixty-Nine nagpahinga

pagkalampas ng hangganan ng Quezon at Laguna

doon naghihiwalay ang Mabitac at Pililla

namuti sa kapote ang mahaba naming pila

pagkat umuulan noon, nakakapote lahat

umupo ako sa bato habang dinadalumat

ang adhikaing nakaatang sa aming balikat

na talagang kakayanin gaano man kabigat

upang irehistro ang pagtutol sa Kaliwa Dam

upang ipagtanggol ang buhay at kinabukasan

at depensahan ang lupang ninuno't kalikasan

lalo ang Sierra Madre, ang buong kabundukan

buti't ako'y nakiisa, kaya damang-dama ko

ang kanilang ipinaglalaban, at ang prinsipyo

dama mo ito kung nauunawaan ang isyu

kaya sila'y ipaglalaban mo hanggang sa dulo

- gregoriovbituinjr.

02.18.2023

* kinatha habang nagpapahinga sa simbahan ng Famy kung saan doon na rin kami naglatag ng banig at nagpalipas ng magdamag

Sa UP at sa Barangay Kapatalan

SA UP AT SA BRGY. KAPATALAN

tilapyang sinabawan yaong inagahan namin

naglagay ng tubig sa bote't nakasipilyo rin

maya-maya'y humanay na't umpisa ng lakarin

upang ipagpatuloy ang minimithing layunin

may sumalubong sa UP, nagpameryenda sila

saging na lakatan, biskwit, isang boteng tubig pa

mga katutubo ang nangolekta ng basura

makikita mo talagang sila'y may disiplina

tumuloy sa covered court ng Barangay Kapatalan

sa Siniloan, habang hintay ang pananghalian

ay nagbasketbol ang ilang matanda't kabataan

alas-diyes y medya, ang init ay katamtaman

may namigay pa roong isang plastik ng pilipit

ramdam mo ang suportang di nila ipinagkait

- gregoriovbituinjr.

02.18.2023

* kinatha ng tanghali habang nagpapahinga sa covered court Barangay Kapatalan sa Siniloan, Laguna

Isang minutong katahimikan

ISANG MINUTONG KATAHIMIKAN

isang minutong katahimikan

ang inalay bago mag-agahan

para sa kasamang namatayan

narinig ko sa nagsasalita

kaya iniyuko ko ang mukha

bilang paggalang sa namayapa

ikapito nang kami'y naglakad

kahit marami na ang may edad

na asam kamtin ang hinahangad

- gregoriovbituinjr.

02.18.2023

* kinatha ng umaga sa simbahan ng Brgy. Llavac, Real, Quezon

Sa simbahan ng Llavac

SA SIMBAHAN NG LLAVAC

elementary school ang una kong tinulugan

sa Llavac noong unang Lakad Laban sa Laiban Dam

akala ko'y doon muli, ngayon na'y sa simbahan

ikalawang pagtulog ko sa Llavac, kainaman

ginagawa ang simbahan, at sa semento muli

kami naglatag ng banig, at aking winawari

na lakarang ito'y isang pagbabakasakali

kaysa tiklop lang ang tuhod, ipaglaban ang mithi

sa ganito ko nakikita ang aming layunin

mabuting kumilos kaysa lahat lang ay tanggapin

itigil ang Kaliwa Dam, kaylinaw ng mithiin

sumama sa lakad na may dakilang adhikain

nakataya ang kalikasan at lupang ninuno

nakataya ang buhay at bukas ng katutubo

pag nagawa ang dam ay matataboy sa malayo

baka pagkatao't kultura'y tuluyang maglaho

maginaw ang buong gabi't umuulan sa labas

may bagyo ba, tikatik ng ulan ay lumalakas

kailangan naming magpahinga upang may lakas

pagkat malayo pa ang lalakarin namin bukas

- gregoriovbituinjr.

02.17.2023

* kinatha ng makatang gala habang nagpapahinga sa simbahan ng Barangay Llavac, Real, Quezon

300

300

tila kami mandirigmang langgam

tatlong daang kawal laban sa dam

naglalakad na ang tanging asam

ay di matuloy ang Kaliwa Dam

buhay ang taya kaya tumutol

lupang ninuno'y pinagtatanggol

laban sa imbi, kuhila't ulol

na bulsa lang ay pinabubukol

kaya patuloy ang aming hiyaw

ang pagtutol sa dam ay kaylinaw

pag natuloy, parang may balaraw

sa likod ang tumarak, lumitaw

sa lakaran, malinaw ang pakay

na sadyang napakalaking bagay

ipagtanggol ang bukas at buhay

iyan ang aming adhikang lantay

- gregoriovbituinjr.

02.17.2023

* kinatha sa pinagpahingahang simbahan sa Brgy. Llavac, Real, Quezon, kasama ang makatang gala sa Alay-Lakad Laban sa Kaliwa Dam

Lugaw, sambalilo, tsinelas at kapote

LUGAW, SAMBALILO, TSINELAS AT KAPOTE

madaling araw ay nagising at umihi

ang lamig ng semento'y tagos ng masidhi

banig lang ang pagitan, ako'y hinahati

sakaling magkasakit ay di ko mawari

ikaanim ng umaga'y nais magkape

bago magkanin ay naglugaw muna kami

mayroong tsinelas, sambalilo't kapote

binigay nang maprotektahan ang sarili

ehersisyo muna sa Barangay Tignoan

doon sa covered court na aming tinuluyan

kaylakas ng hangin, talagang kabundukan

nilabhan nga nami'y natuyo agad naman

di ko alintana gaano man kahaba

ang kilo-kilometrong lalakaring sadya

mula General Nakar patungong Maynila

para sa isyu, ang pagod ay balewala

- gregoriovbituinjr.

02.17.2023

* kinatha sa umaga ng Alay-Lakad Laban sa Kaliwa Dam habang nagpapahinga sa covered court ng Brgy. Tignoan, Real, Quezon, ikapito ng umaga ay nag-umpisang muli ang lakaran

Layon ko

LAYON KO

naglakad ako para sa panitikan

isa iyan sa layon ko sa lakaran

sariling kayod para sa panulaan

na larangang aking pinagsisikapan

naglakad ako para sa katutubo

nang buhay at bukas nila'y di maglaho

naglakad din para sa lupang ninuno

dahil kapwa Pilipino at kadugo

tanto kong di ako magaling bumigkas

ng mga taludtod sa anyong madulas

ngunit sa mukha ko'y inyong mababakas

kung paano bang sa pagtula'y matimyas

totoo namang ako'y nagboluntaryo

upang makasama sa lakarang ito

pagkat dama kong katutubo rin ako

at kaisa ng Dumagat-Remontado

sumama sa Lakad Laban sa Laiban Dam

na ilang taon na ang nakararaan;

sa Alay-Lakad Laban sa Kaliwa Dam

ngayon ay sumama sa kanilang laban

nawa'y magtagumpay ang aming adhika

na Kaliwa Dam ay matutulang sadya

pagkat sa Kaliwa Dam ang mapapala

ay pawang ligalig, kamatayan, sigwa

- gregoriovbituinjr.

02.17.2023

* kinatha ng madaling araw sa aming tinulugang covered court sa Brgy. Tignoan, Real, Quezon

* kasama ang makatang gala sa Alay-Lakad Laban sa Kaliwa Dam

15 Km. sa umaga

15 KM. SA UMAGA

umaga pa'y nakalabinlimang kilometro na

alas-sais pa lang, naglakad na kami, kay-aga

madaling araw nang umulan, kami'y nagising na

kaya nang magbukangliwayway ay agad lumarga

ilang beses kaming inulan sa dinaraanan

kaya basang-basa kami pati kagamitan

mabibilis ang lakad, matutulin bawat hakbang

narating ang basketball court ng Barangay Tignoan

may ilaw man ngunit walang saksakan ng kuryente

di maka-charge ng selpon, gayunman, ayos lang kami

di lang makapagpadala kay misis ng mensahe

at sabihing kami't nasa kalagayang mabuti

maagang nagpahinga, maaga kaming dumating

alas-dose pa lang, banig ay inilatag na rin

habang nadarama ang kaytinding hampas ng hangin

anong ginaw ng dapithapon, maging takipsilim

- gregoriovbituinjr.

02.16.2023

- kinatha manapos makapanghalian sa covered court ng Brgy. Tignoan, Real, Quezon, nilakad ay mula Km 129 hanggang Km114

Balikwas

BALIKWAS

alas-dos ng madaling araw ay napabalikwas

sa basketball court, ulan ay bumagsak ng malakas

at agad kaming nagsibangon upang makaiwas

sa ulan at karamdamang maaaring lumabas

mahirap magkasakit, mahaba pa ang lakarin

lalo't may tangan kaming adhikain at layunin

kaunting idlip lang, alas-tres na'y naligo na rin

di na nakatulog, naging abala sa sulatin

nang tumingala'y tila maulap ang kalangitan

gayong may sumilip na bituing nagkikislapan

na tila nagsasabing di matutuloy ang ulan

na magandang senyales sa mahaba pang lakaran

sana nga sa landasin, ulan ay di sumalubong

gayunman, kahit umulan ay di kami uurong

- gregoriovbituinjr.

02.16.2023

* kinatha madaling araw ng Alay-Lakad Laban sa Kaliwa Dam habang nagpapahinga sa covered court ng Brgy. Cawayan, Real, Quezon

Pagtatasa

PAGTATASA

munting pagtatasa matapos ang hapunan

gamit ang megaphone ay nagkatalakayan

may mga mungkahi't ilang problema naman

mabuti't nagsabi, nabigyang kalutasan

sinabi ang nadama, walang hinanakit

malinaw naman ang adhikain kung bakit

kaya pang lumakad, paa man ay sumakit

dahil may paninindigang dapat igiit

mabubuti naman ang mga payo't puna

ang huwag tumawid sa kabilang kalsada

sakali mang may matapilok, magpahinga

alas-dos ng madaling araw, maligo na

maghanda na ng alaxan at gamot ngayon

mahaba pa ang lakad bukas at maghapon

ihanda rin ang sumbrero pati na payong

na minungkahi sa mga nais tumulong

naroon kaming nagkakaisang tumindig

upang sa madla'y ipakitang kapitbisig

simpatya ng publiko sa isyu'y mahamig

doon kami binigyan ng tigisang banig

may mga tsinelas din daw na ibibigay

huwag ding lumabas sa lubid, nasa hanay

sa mga senyor na pagod, pwedeng sumakay

ikasiyam ng gabi'y natapos itong tunay

- gregoriovbituinjr.

02.15.2023

* kinatha sa gabi ng Alay-Lakad Laban sa Kaliwa Dam habang nagpapahinga sa covered court ng Brgy. Cawayan, Real, Quezon

Sa biglaang pag-ulan

SA BIGLAANG PAG-ULAN

habang naglalakad ay biglang bumuhos ang ulan 

ngunit wala kaming kapote o payong man lamang

basang-basa ang buong martsa't walang masilungan

sa Barangay Kiloloron na kami inabutan

ang mahabang manggas na polo ng aking katabi

ay binalabal sa akin ng matandang babae

marahil, akala'y katribu't sama-sama kami

sa sakripisyo upang maparating ang mensahe

balabal ay binalik ko nang inabot sa akin

ang isang dahon ng saging na ipinayong namin

isang babae'y nagbigay ng plastic bag na itim

upang aking sukbit na bag ay agad kong balutin

upang di mabasa ng ulan, hanggang sa tumila

dalawang katutubong talagang kahanga-hanga

dalawang may magagandang puso, sadyang dakila

salamat po, di ko malilimot ang inyong gawa

- gregoriovbituinjr.

02.15.2023

* kinatha sa gabi ng Alay-Lakad Laban sa Kaliwa Dam habang nagpapahinga sa covered court ng Brgy. Cawayan, Real, Quezon

Simula ng lakad

SIMULA NG LAKAD

mula Sulok sa General Nakar na'y nag-umpisa

ang aming paglalakad, ikapito ng umaga

mga lider-katutubo ang siyang nangunguna

sa simbahan ng Nakar, dumalo muna ng misa

nagpatuloy ang lakad hanggang bayan ng Infanta

sa isang basketball court kami'y nagsitigil muna

umupo at nakinig sa inihandang programa

maiinit na talumpati'y sadyang madarama

matapos iyon, nananghalian na't nagpahinga

bandang alas-dos ng hapon muli kaming lumarga

tangan ang adhikaing magtatagumpay ang masa

na proyektong Kaliwa Dam ay matigil talaga

- gregoriovbituinjr.

02.15.2023

* kinatha sa gabi ng Alay-Lakad Laban sa Kaliwa Dam habang nagpapahinga sa covered court ng Brgy. Cawayan, Real, Quezon

Madaling Araw sa Sulok

MADALING ARAW SA SULOK

naalimpungatan / sa madaling araw

doon sa aplaya'y / sadyang anong ginaw

ang papayang buwan / pala'y nakalitaw

tunay siyang gabay / sa amin tumanglaw

tila baga isang / payapang lakaran

ang kakaharapin / kundi man labanan

upang ipagtanggol / yaong kalupaan 

para sa kanila / ring kinabukasan

dinig ang ragasa / ng alon sa dagat

habang may ilan nang / gising at nagmulat

ramdam ang amihan / o baka habagat

tila nagbabadyang / tayo ay mag-ingat

kay-agang natulog / bandang alas-nwebe

alas-tres na'y gising, / kami na'y nagkape

- gregoriovbituinjr.

02.15.2023 3:07am

* kinatha ng makatang gala habang nagpapahinga sa Sitio Sulok

Sa bus

SA BUS

nakasakay na ako ng bus patungong Infanta

eksaktong ikalawa ng hapon ay umandar na

naglalakbay ako sa panahong kaaya-aya

upang sa isang dakilang layon ay makiisa

mula Legarda, pamasahe'y tatlong daang piso

mabuti't sa bulsa'y may natatagong isang libo

pagbaba'y magta-traysikel, iyon kaya'y magkano

papuntang General Nakar na kaylayong totoo

mula roon ay siyam na araw naming lakaran

na tawag ay Alay-Lakad Laban sa Kaliwa Dam.

upang iparating ang mensahe sa sambayanan

na ayaw nila sa Kaliwa Dam, dapat tutulan

dahil ang kalikasan ay mawawasak na sadya

dahil ang kanilang lupang ninuno'y masisira

baka kinabukasan ng katutubo'y mawala

pag proyekto'y natayo, tahanan nila'y mawala

- gregoriovbituinjr.

02.14.2023

* selfie bago sumakay ng bus patungong Infanta, Quezon, sa Legarda, Maynila

Paggayak para sa mahabang lakaran

PAGGAYAK PARA SA MAHABANG LAKARAN

O, kaytagal kong naghintay ng mahabang lakaran

at may magandang pagkakataong dapat alayan

ng prinsipyo upang ipaglaban ang karapatan

sasama sa Alay-Lakad Laban sa Kaliwa Dam

matapos sumama mahigit nang isang dekada

sa Lakad Laban sa Laiban Dam muling nakiisa

upang lupang ninuno't katutubo'y madepensa

ngayon, sa isyung Kaliwa Dam naman ay sasama

sa paglalakad ay muling tutula't mag-uulat

mabatid ang kaibuturan at maisiwalat

noon, Lakad Laban sa Laiban Dam ay sinaaklat

ngayon, sa Kaliwa Dam ay muling gagawing sukat

ngayon ay naggagayak na sa mahabang lakaran

tsinelas, twalya, sipilyo, susuutin, kalamnan

makakain, inumin, kwaderno, bolpen, isipan

halina't sa paglalakad, kami'y inyong samahan

- gregoriovbituinjr.

02.14.2023

* ang Alay-Lakad Laban sa Kaliwa Dam ay magsisimula ng Pebrero 15-23, 2023 mula General Nakar sa Quezon Province hanggang sa Malakanyang

* ang litrato ay ang pabalat ng aklat na Lakad Laban sa Laiban Dam na nalathala noong 2009

* subaybayan ang facebook page na Earth Walker para sa ilang balita at tula habang naglalakbay

Pagpunta sa presscon

PAGPUNTA SA PRESSCON

paglalakad muli laban sa dam

ang paksa ng presscon at nagpasya

sasama ako't ipapaalam

ang isyu sa mayorya ng masa

naglakad na kasi ako noon

yaong Lakad Laban sa Laiban Dam

isang dekada higit na iyon

na pagtutol sa dam ang inasam

tagos sa puso ang unang binhi

at sa pangalawa'y sasama rin

pinakinggan ko ang mga sanhi

maraming bayang palulubugin

narinig ang mga katutubo

sa talumpati nila sa presscon

kalikasan at lupang ninuno

ay sisirain ng dam na iyon

kaya ako'y agad nang nagpasya

na sasama muli sa lakaran

ang marinig ko sila'y sapat na

upang samahan sila sa laban

- gregoriovbituinjr.

02.13.2023

* ang litrato'y kuha ng makatang gala sa nasabing presscon

Dalawang Araw ng Puso

DALAWANG ARAW NG PUSO

Pebrero Katorse, Araw ng mga Puso

Setyembre Bente Nwebe, Araw din ng Puso

Una'y hinggil sa ating pagsinta't pagsuyo

Sunod, puso'y alagaan nang di maglaho

Una'y araw ng mga pusong nagniniig

Kung saan nadarama'y pintig ng pag-ibig

Sunod, pusong alaga'y di basta mayanig

Ng cardiac arrest kaya buhay pa'y lalawig

Di lamang pag-ibig kundi pangangatawan

Ang alalahanin nati't pangalagaan

Una'y batid bago pa magkaasawahan

Ikalwa'y pag nagsama na sa katandaan

Buhay pa rin tayo kapag puso'y nasawi

Sa atake sa puso'y dami nang nasawi

- gregoriovbituinjr.

02.12.2023

* February 14 is Valentine's Day

* September 29 is World Heart ❤️ Day

* litrato mula sa google

Pagninilay

PAGNINILAY

kaytahimik ng kapaligiran

may punong walang kadahon-dahon

tila nasa malayong silangan

alapaap ay paalon-alon

buti't nababahaw na ang sugat

habang sa kawalan nakatingin

ninais ko nang maisiwalat

ang pangyayaring di pa mapansin

hanging sariwa ang dumadampi

sa pisngi ko't pangang naninigas

tila nawala ang damang hapdi

ng loob kong nais nang mag-aklas

tahimik ngunit di pa payapa

pagkat loob pa'y tigib ng luha

- gregoriovbituinjr.

02.11.2023 

Liwayway

LIWAYWAY

kaysarap makatunghay

ng nobela, sanaysay

kwento'y mabasang tunay

sa magasing Liwayway

pagkat nananariwa

ang aking pagkabata

nahalina sa tula

at ngayon kumakatha

buti't may babasahin

tulad nitong magasin

na binibigyang-pansin

ang pagkamalikhain

dati ay linggo-linggo

bente pesos ang presyo

kada buwan na ito

at isangdaang piso

kahit na nagmahalan

ay sinusuportahan

pagkat ito'y lagakan

ng ating panitikan

baya'y di nagsasalat

kapag may nag-iingat

ng panitikang mulat

sa haraya'y dalumat

- gregoriovbituinjr.

02.10.2023

Ang isang kilong sibuyas

ang isang kilong sibuyas

ay para na ring alahas

pagkat ang ipinamalas

ay pagmamahal na wagas

- dalít ni gregoriovbituinjr.

02.09.2023

* ang dalít ay katutubong tulang may apat na taludtod at may sukat na walong pantig bawat taludtod

Tatlong pritong tilapya

TATLONG PRITONG TILAPYA

kahapon, bumili ako ng tatlong isda
nang sa buong maghapon ay ulam kong sadya
trenta'y singko pesos bawat pritong tilapya
madalas, ganyan ang buhay nitong makata

ang isa'y inulam ko na kinagabihan
isa'y pinagsamang almusal, tanghalian
isa pa'y iuulam mamayang hapunan
madalas, ganyan kaming tibak na Spartan

hahaluan ng sibuyas, bawang, kamatis
upang sa kagutuman ay di na magtiis
ganyan man, di kami pulubi sa dalisdis
kundi tibak, kalaban ng nagmamalabis

tatlong pritong isda sa maghapon, magdamag
basta iwing katawan ay di mangangarag
na sa pagkilos, patuloy na nagsisipag
nang sistemang bulok ay tuluyang malansag

- gregoriovbituinjr.
02.09.2023

Hapunan

HAPUNAN

sa aking lungga'y tigib ng lumbay

pagod sa mahabang paglalakbay

sa kawalan ay may naninilay

habang dito'y nagpapahingalay

at maya-maya'y maghahapunan

upang maibsan ang kagutuman

diwa'y tumatahak sa kawalan

di malaman ang patutunguhan

hanggang isa-isang isusubo

yaong mga ulam na niluto

hanggang unti-unti nang maglaho

yaong gutom at pagkasiphayo

babawiin ang nawalang lakas

tatahakin din ang ibang landas

upang kagutuman ay malutas

at maitayo'y lipunang patas

- gregoriovbituinjr.

02.08.2023

Almusal

ALMUSAL

tara nang kumain, kaibigan

ako naman ay iyong saluhan

at mainit-init pa sa tiyan

tarang kumain bago umalis

patungo sa papasukang opis

mahirap nang sa gutom magtiis

gaano man kasimple ang ulam

sa gutom nama'y nakakaparam

at sikmura'y di basta kakalam

pagkaing karaniwan at payak

nang di naman gumapang sa lusak

pag nabusog pa'y iindak-indak

huwag magpakagutom - ang payo

nang di makadama ng siphayo

- gregoriovbituinjr.

02.08.2023

Ulam na kamatis at sibuyas

ULAM NA KAMATIS AT SIBUYAS

kamatis at alahas, ay mali, sibuyas pala

ang aking pananghalian, at kaysarap talaga

lalo na't magkarne ay sadyang iniwasan ko na

lalo't manok na kadiri na sa aking panlasa

kamatis, bawang, sibuyas, ang naging pampalakas

talbos ng kamote, sayote, sili, at sibuyas

isinasabuhay na rin ang pagkain ng prutas

mga bungangkahoy na kaysarap na panghimagas

sa ngayon, iwasan ang anumang uri ng karne

sa pangangatawan ko'y tila ba naging mensahe

magkalaman ang kalamnan ang adhika't diskarte

upang tumatag sa lakad, wala mang pamasahe

sa ganito ko niyakap ang simpleng pamumuhay

at puspusang pakikibakang may prinsipyong taglay

- gregoriovbituinjr.

02.02.2023

Sa paglalakad

SA PAGLALAKAD

samutsari ang nakikita sa paligid

karetelang hila't babaeng tumatawid

ang nagliliparang ibon sa himpapawid

mensaherong may mga sobreng ihahatid

kagagaling ko lang noon sa isang rali

nang sa paglalakad ay may napagmumuni

nasa isip ang bayan imbes na sarili

kaya patuloy ang pagkilos araw-gabi

may isang metrong inilaan sa bangketa

upang ang tao'y may malakaran talaga

may sangmetro ring inilaan sa kalsada

para naman sa mga nagbibisikleta

nakapinta sa pader ay kaygandang mural

at sa pinanggalingan ko'y kayraming aral

pakikibakang masidhi't ano't kaytagal

dapat tanikala'y lagutin na ng punyal

kayraming paksa sa aking harap at likod

mga nagalugad ay may lungkot at lugod

may unat at baluktot, tuwid at pilantod

na nais kong ipinta sa mga taludtod

- gregoriovbituinjr.

01.31.2023

Ang hanap

ANG HANAP

hinahanap ko kung saan ba may silbi sa bayan

sa kapwa dukha, uring manggagawa, mamamayan

ngunit di hanap ang pansariling kaligayahan

na kakain lang, tutulog lang, pulos pahinga lang

pagkat di ako tamad, anong sipag kong totoo

isang araw isang tula ay masaya na ako

tumangan ng bandera o plakard sa parlyamento

ng lansangan o magsulat ng pahayag sa isyu

di ko maisip bakit ang mata'y pinapupungay

kung saan matapos ang gawain ay laging tagay

mas nais ko pang sa aklatan o bukstor tumambay

bakasakaling may matututunang maging gabay

ah, napakapayak lamang ng aking hinahanap

na lipunang makatao'y maitayo nang ganap

mapuno man iyon ng mga sakripisyo't hirap

masaya nang makapagsilbing walang pagpapanggap

- gregoriovbituinjr.

01.25.2023

Alaga

ALAGA

nakatulog na ang aming alaga

na dalawang kuting at inang pusa

matapos nilang manghuli ng daga

at nabusog sa twalya'y nagsihiga

nakatitig lang akong di mainip

sa kanilang anong sarap ng idlip

ano kayang kanilang panaginip

o kaya'y ang mga nasasaisip

matutulog na rin ako't antok na

sa panaginip kaya'y magkikita

silang tanging bigay ko'y mga tira

aba'y babalitaan na lang kita

- gregoriovbituinjr.

01.24.2023

Basurahan sa dyip

BASURAHAN SA DYIP

Zero Waste Month ngayong Enero

uy, may buwan palang ganito

nakakatuwa pagsakay ko

ng dyip sa madla'y may abiso

"Throw your trash here" ang nakasulat

uy, itapon mo raw ang kalat

sa basurahan doong sukat

abisong unawa ng lahat

ay, salamat sa mga tsuper

sa kalinisan, kayo'y eager

tungkulin din pala ng drayber

na kalikasa'y di ma-murder

- gregoriovbituinjr.

01.22.2023

Libo-libong hakbang man

LIBO-LIBONG HAKBANG MAN

kailangan ko bang lakarin ang sanlibong hakbang

upang umani ng kaing ng manggang manibalang

upang marating ang bundok at tagtuyot na parang

upang di maligaw sa pasikot-sikot na ilang

kahit libo-libong hakbang pa'y aking lalakarin

limampunglibo, sandaang libo, sang-angaw man din

kung tungong tagumpay ng nakasalang na usapin

kung iyan ang paraan upang kamtin ang mithiin

upang malutas lang ang mga sigalot at sigwa

lalakarin milyong hakbang man na may paniwala

mananaig tayo sa kabila ng dusa't luha

ang daan man patungo roon ay kasumpa-sumpa

- gregoriovbituinjr.

01.19.2023

Kalikasan

KALIKASAN

lubhang matarik ang mga bangin

na dulot ng bawat kong panimdim

na ninais ko pa ring akyatin

huwag lamang abutin ng dilim

anong sarap damhin ng amihan

sa nilalakaran kong putikan

ngunit kalbo na ang kabundukan

wala nang hayop sa kagubatan

winawasak na ng pagmimina

ang katutubong lupain nila

kalikasa'y di na makahinga

sa kaytitinding usok sa planta

mga basura'y lulutang-lutang

sa matinding klima'y nadadarang

natutuyot na ang mga parang

nakatiwangwang ang lupang tigang

O, Kalikasan, anong ganda mo

ngunit sinisira ka ng tao

pinagtutubuan kang totoo

at kung gumanti ka'y todo-todo

Ikaw, Kalikasan, pag nagngitngit

ay ramdam namin ang pagngangalit

ulan ay kaytinding ilang saglit

lulubugin kaming anong lupit

- gregoriovbituinjr.

01.19.2023

Ang larawan

ANG LARAWAN

animo'y painting ang larawan

nang makunan sa dapithapon

anong ganda ng paraluman

sa iwing puso'y naglimayon

para bang sadyang iginuhit

ng isang mapagpalang kamay

ang litratong kaakit-akit

sa mata kong tigib ng lumbay

- gregoriovbituinjr.

01.17.2023

Paghahanap

PAGHAHANAP

nakatunganga lang sa kawalan

may dinadalumat na anuman

animo'y lawin sa kalawakan

kapag lumilipad ang isipan

may madadagit bang bagong paksa

tila baga laging nanghuhula

at naroroong nakatulala

hinihintay humupa ang sigwa

madalas ganyan ang pakiramdam

tila may usaping di maparam

kung bakit laging may pagkabalam

siya lamang ang nakakaalam

bakit ba mundo'y puno ng ganid?

baluktot pa ba'y maitutuwid?

bakit maging sa pagsulat umid?

ano bang dapat nating mabatid?

kayraming katanungan sa mundo

kung di masagot, nasisiphayo;

nang susing salita'y di mahango

ay unti-unti siyang naglaho

- gregoriovbituinjr.

01.17.2023

* litratong kuha ng makatang gala sa Rizal Park sa Maynila, 12.30.2022

Tarang magtanim ng sibuyas

 

TARANG MAGTANIM NG SIBUYAS

buti pa'y magtanim ng sibuyas

kaysa bumili na lamang nito

baka ito na ang tamang landas

nang di hirap sa taas ng presyo

animo ang bulsa na'y nabutas

nandaya ba ang mangangalakal?

sibuyas na'y ginawang alahas

ang dating mura'y ano't nagmahal?

talagang nais ko nang magmura

ang sibuyas na nagpresyong ginto

paano malutas ang problema

upang di naman tayo manlumo

ah, mabuti pang tayo'y magtanim

ng sibuyas, di man magsasaka

upang malutas na ang panimdim

at baka ito na'y mapamura

- gregoriovbituinjr.

01.16.2023

Mag-iinang pusa

MAG-IINANG PUSA

masdan mo ang mag-iinang pusa

sarap na sarap sa tirang isda

na sa kanila'y biyayang sadya

mula sa isang mapagkalinga

hayop man sila'y parang tao rin

na naghahanap ng makakain

madalas pang sa iyo'y titingin

kung may pagkain para sa kuting

pusang galang tambay sa bakuran

mag-iinang walang hiwalayan

kumakain sila'y pinagmasdan

sa ganoong tagpo'y binidyuhan

- gregoriovbituinjr.

01.16.2023

* mapapanood ang bidyo sa:

https://www.facebook.com/tulatulatnigregoriovbituinjr/videos/731306411570988

Nais ko nang umuwi

NAIS KO NANG UMUWI

nais ko nang umuwi sa bayan kong tinubuan

na kaytagal na panahon ding di ko nagigisnan

upang madalaw ang mga kapatid ko't magulang

kumustahin sila't kina ina'y magbigay-galang

kaytagal kong asam ang muli naming pagkikita

lalo ang pagpapalitang-kuro namin ni ama

kapwa retiradong empleyado sila ni ina

habang ako'y isang mapagpalayang aktibista

nahasa ako noon sa mga sermon ni inay

at sa pangaral ni itay na aking naging gabay

bilin nilang kung anong gusto ko'y magpakahusay

dahil ako ang pipili nitong ikabubuhay

pinili kong magpakahusay bilang manunulat

maging makata't sa maraming isyu'y nag-uulat

maging aktibistang sa mga api'y nagmumulat

nang lipunang makatao'y itayo nilang sukat

nais kong umuwi, tulad ni Rizal sa Calamba

tulad ni Bonifacio, na pinaslang ng kuhila

nais kong umuwing kasama'y manggagawa't dukha

nais ko nang umuwi sa kamay na mapagpala

- gregoriovbituinjr.

01.15.2023

Pagmumuni

 

PAGMUMUNI

di ko hintay na magnaknak ang sugat ng salita

habang iniinda ang sariling galos at iwa

di ko hintay magdugo muna ang noo ko't diwa

upang mapiga't kumatas ang asam na kataga

di tahimik gayong ang hanap ko'y katahimikan

sa kapaligirang punong-puno ng sigalutan

di payapa gayong ang hanap ko'y kapayapaan

ng puso't diwang umaasam ng kaginhawahan

ninanais kong madalumat ang ibig sabihin

ng karanasan sa mga madawag na landasin

ng karahasan sa mundong ginagalawan natin

ng karaingan ng maraming naghihirap pa rin

anong kawastuhan sa gawang pagsasamantala?

upang bumundat pang lalo ang tiyan nila't bulsa

ang mga api ba'y may aasahang santo't bida?

gayong may magagawa kung sila'y magsama-sama

nadarama rin ba natin ang sugat ng daigdig?

dahil tila ba ito'y halos mawalan ng pintig?

sapat ba ang salita sa tula upang mang-usig?

o mga api'y magsikilos na't magkapitbisig?

- gregoriovbituinjr.

01.15.2023

Si Muning

SI MUNING

tila siya di mapakali

at animo'y may sinasabi

ano raw gawa ko kagabi

habang may dilag na katabi

at ibinalik ko ang tanong

kumusta ang bigay kong labong

tila siya'y bubulong-bulong

buti pa ang isda at tutong

sa gayong punto ng usapan

ay agad nagkaunawaan

ibigay ko ang kahilingan

siya'y hahaplusin ko naman

kayganda ng mga pangarap

na bawat isa'y nililingap

patuloy lang tayong mag-usap

at nang magkatulungang ganap

- gregoriovbituinjr.

01.14.2023

Tara, mag-zero waste na

TARA, MAG-ZERO WASTE NA

zero waste month pala ang Enero

na nagpapaalalang totoo

lumalala ang lagay ng mundo

dahil sa kagagawan ng tao

tapon ng tapon dito at doon

kung saan-saan lang nagtatapon

anong dapat nating maging tugon

kung sa basura'y di makaahon

masdan ang daigdig at magnilay

magsuri tayo't magbulay-bulay

at ang maaksayang pamumuhay

ay dapat na ngang baguhing tunay

huwag hayaang pulos basura,

upos at plastik ay maglipana

mundo'y bahay mo't tahanan nila

kaya huwag hayaang dumhan pa

ecobag, di plastic bag, ang gamit

linisin palagi ang paligid

upang tayo'y di magkakasakit

zero waste ay dapat nating batid

simulan nating gawing panata

zero waste lifestyle ay isadiwa

gawin natin kahit tayo'y dukha

para sa bukas ng mundo't madla

- gregoriovbituinjr.

01.12.2023

Kape

KAPE

maginaw na umaga'y

salubunging kayganda

at agad magtitimpla

nitong kape sa tasa

pagkakape na'y ritwal

bago pa mag-almusal

nang sa gawa'y tumagal

at di babagal-bagal

kailangang bumangon

kikilos pang maghapon

tarang magkape ngayon

bago gawin ang layon

- gregoriovbituinjr.

01.07.2023

Sa Luneta

SA LUNETA

tarang mamasyal sa Luneta
kahit na tayo'y walang pera
ang wika nga sa isang kanta
pambansang liwasan talaga

halina sa isang upuan
sa Rizal Park, dating tambayan
upang kita'y magkumustahan
kumain at magkakwentuhan

lalo't paligid ay kayhangin
habang may saliw na awitin
kayraming namamasyal man din
na Bagumbayan din sa atin

tara, doon tayo'y mamasyal
kung saan binitay si Rizal
upang pagkahapo'y matanggal
at damhin yaring pagmamahal

- gregoriovbituinjr.
01.06.2023

* litratong kuha ng makatang gala sa Luneta, Araw ni Rizal, 12.30.2022

Paglalakbay

PAGLALAKBAY

patuloy na naglalakbay yaring diwa

upang masalubong ang sintang diwata

nais kong ngumiti kahit lumuluha

magbakasakaling makita ang mutya

kinatha ko'y di man tirintas ng sugat

tumigis na dugo'y kaya pang maampat

pluma'y tangan habang dama'y inaalat

bawat hikbi't daing ay nagiging pilat

sa mga lansangan, basura'y umapaw

naglipana'y plastik, doo'y nilalangaw

at yaong pusali'y umaalingasaw

kaya kalikasan, ngayo'y namamanglaw

gagawin ko pa rin ang kinahiligan

yaong pakikinig ng mga kundiman

pagbasa ng tula, dula't kwentong bayan

habang naglalakbay pa rin sa kawalan

- gregoriovbituinjr.

01.06.2023

Sibuyas

SIBUYAS

tila baga alahas
ang presyo ng sibuyas
sino kayang nagbasbas
sa presyong lampas-lampas
talagang lumalabas
na di sila parehas
gaano ba katigas
iyang mukha ng hudas
ito ba'y bagong landas
sa lupang dinarahas
aba'y di ito patas
sa madlang dusa'y wagas
di ba nila nawatas
baka masa'y mag-aklas

- gregoriovbituinjr.
01.05.2022

* litrato't ulat mula sa Abante, 12.28.2022, p.2

Puno sa lungsod

PUNO SA LUNGSOD

anong sarap ng simoy ng hangin sa lungsod

sapagkat may mga puno, nakalulugod

tila baga hinahaplos ang aking likod

ng palad ng mutya, nakakawalang pagod

kung pupunuin ng puno ang kalunsuran

ay bubuti ang lagay ng kapaligiran

animo'y walang polusyong mararamdaman

dama'y ginhawa sa gitna ng kainitan

O, pagmasdan ang maaliwalas na langit

dahil mapuno, katamtaman lang ang init

walang mga duming sa kutis dumidikit

dahil sa puno, katawa'y di nanlalagkit

isang araw iyong dama mo'y inspirasyon

kaya magtanim ng puno'y isa nang misyon

di man masilayang tumubo ito ngayon

ito'y para sa susunod na henerasyon

- gregoriovbituinjr.

01.04.2023

* litratong kuha ng makatang gala sa Luneta noong Araw ni Rizal, 12.30.2022

Ugat

UGAT

di lang mula sa nagnaknak kong sugat namulaklak

ang mga tulang sa nagdugong puso'y nagsipatak

mas pa'y mula sa paglaban ng mga hinahamak

upang dignidad bilang tao'y kilalaning tiyak

kadalasang nag-ugat diyan yaring iwa't katha

na kung gumaling man ay balantukan pa ring sadya

bakit karapatan ay laging binabalewala?

habang may inaapi, sugat ay nananariwa

at pag narinig ko yaong mga impit at hibik

ng pinagsasamantalahan ng kuhila't lintik

ay agad sasaklolo gamit ang angking panitik

upang ilantad ang kanilang sugat na dinikdik

sa katampalasanan karaniwang nag-uugat

kaya nakakakatha't layon ay makapagmulat

- gregoriovbituinjr.

01.03.2023

Nilay

NILAY

napagbulay-bulay

ang maraming bagay

habang nagninilay

ay di mapalagay

dinamdam ang lumbay

ng walang karamay

dinaan sa tagay

at mata'y pumungay

wika'y malumanay

nang biglang dumighay

pilapil, binaybay

tinawid ang tulay

walang nakasabay

nang malangong tunay

naghikab, humimlay

sa daan lupasay

- gregoriovbituinjr.

01.03.2023

Ligaw na Bala, New Year 2023

LIGAW NA BALA, NEW YEAR 2023

may natamaan muli ng ligaw na bala

ngayong New Year ay may mga bagong biktima

para bang kating-kati ang daliri nila

na kumalabit ng gatilyo't sayang-saya

sinabayan ang putukan ng Bagong Taon

upang mamaril sinuman ang mga iyon

sila kaya'y sino, mayayabang bang maton?

na naglalaway, animo'y gutom na leyon!

minsan, nakakapanginig ang mga ulat

kung batid mong may batang natamaang sukat

noon at ngayon, di ka pa ba mamumulat

kayraming napatay, ang iba'y nagkasugat

kailan ba kulturang ito'y mapipigil?

pag mahal sa buhay na nila ang nakitil?

ng mga ligaw na balang talagang taksil

na kagagawan ng mga palalo't sutil

hustisya sa natamaan ng stray bullet

na di na magmumulat, permanenteng pikit

lalo na't ang mga natamaan pa'y paslit

na yaong buhay ay kay-agang kinalawit

- gregoriovbituinjr.

01.02.2023

* May ulat mula sa:

GMA News Online: Stray bullets injue two people in Abra New Year revelry

Manila Bulletin: Woman wounded by stray bullet in Iloilo City

Phil News Agency: 2 indiscriminate firing incidents 'mar' New Year revelries

The Star: 13-year old boy from Maramag, Bukidnon was wounded by a stray bullet on Christmas Eve    

Bagong Taon, Lumang Sistema

BAGONG TAON, LUMANG SISTEMA

may nagbago ba sa Bagong Taon

o petsa lang ang nabago roon

na kung dati'y nasa barungbarong

ay nakatira ka na sa mansyon

kung naturingan kang hampaslupa

kaya ka palaging tinutuya

ngayon ika'y nagkakawanggawa

at tumutulong sa maralita

kung dati'y manggagawang kontraktwal

ngayon ay obrero kang regular

kung dati sa lakad napapagal

ngayon may awtong pinaaandar

kung dati, Bagong Taon mo'y tuyo

na umaasa lang sa pangako

ng mga pulitikong hunyango

ngayon, sa hirap mo na'y nahango

kung dati, sa isyu'y walang alam

ngayon, nais mo nang pag-usapan

kung walang paki sa kalikasan

ngayon ito'y inaalagaan

kung sa iyo'y may nagsamantala

ay dahil luma pa ang sistema

ang nagbago lang naman ay petsa

kaya tuloy ang pakikibaka

- gregoriovbituinjr.

01.02.2023

Sa pagsalubong sa Bagong Taon

SA PAGSALUBONG SA BAGONG TAON

7 X 289 = 2023

17 X 119 = 2023

ngayong Bagong Taon ay magnilay

ano na ang susunod na pakay

paano susundin ang patnubay

upang umayos ang pamumuhay

panghawakan pa rin ang prinsipyo

patungo sa pangarap sa mundo

na mahalagang kamting totoo

itayo'y lipunang makatao

sana'y walang mga naputukan

sa mga kamay o natamaan

ng ligaw na bala, ah, na naman?

na sanhi ng biglang kamatayan

bati ko'y Manigong Bagong Taon

patuloy tayo sa ating misyon

kung saan man tayo pumaroon

ay maging matagumpay sa layon

- gregoriovbituinjr.

01.01.2023