Pagpupugay sa 5 namatay na rescuer

PAGPUPUGAY SA LIMANG NAMATAY NA RESCUER

kasagsagan ng bagyong Karding nang sila'y mawala

buhay nila'y pinugto ng bagyong rumaragasa

bigla raw nag-flash flood ng life boat ay inihahanda

gumuho ang isang pader, ayon pa sa balita,

doon sa limang rescuer ay umanod na bigla

sila'y nagsagawa ng isang rescue operation

sa lalawigan ng Bulacan ginawa ang misyon

sa bayan ng San Miguel, iligtas ang naroroon

ginampanan ang tungkulin sa atas ng panahon

ngunit matinding baha ang sa kanila'y lumamon

tagapagligtas natin silang limang nangamatay

tungkuling sa kalamidad ay magligtas ng buhay

ng kanilang kapwa, ang buhay nila'y inialay

upang mailigtas ang iba, mabuhay, mabuhay!

sila'y mga bayani! taospusong pagpupugay!

- gregoriovbituinjr.

09.28.2022

* mga litrato mula sa google

Ondoy at Karding

ONDOY AT KARDING

dalawang bagyong nanalasa 

halos magkaparehong petsa

Setyembre dalawampu't lima

at hanggang kinabukasan pa

nang mag-Setyembre Bente-Sais

anim-na-oras lang, kaybilis

ng Ondoy nang ang Metropolis

ay nilubog, baha'y hagibis

Karding din ay napakatulin

typhoon signal four na tinuring

mga ulat ay ating dinggin

sa Quezon namuro si Karding

handa ba tayo sa ganito?

sa tumitinding klima't bagyo?

pag nanalanta na'y paano?

kay Ondoy ba tayo'y natuto?

panawagang Climate Justice Now

ay narinig bang inihiyaw?

ang aral ba nito'y malinaw?

na sa puso't diwa'y lumitaw?

- gregoriovbituinjr.

09.27.2022

Mantika at dishwashing liquid

MANTIKA AT DISHWASHING LIQUID

halos magkamukha, subalit huwag magkamali

na mantika ang gamitin sa paghugas ng pinggan

o dishwashing liquid kung magpiprito sa kawali

lalo na't magkatabi lang ang kalan at lababo

ay, pag nagkamali ka'y anong laking katangahan

na bawat pagkakamaling ito'y sadyang perwisyo

di sinasadya, pareho pang Spring yaong tatak

magkaiba ng pinagbilhan, di ko rin napansin

pagkabili galing palengke, ihiwalay sadya

lagyan ng "Di ito mantika" ang dishwashing liquid

ang mantika naman ay lagyang "ito'y bumubula"

ay, huwag kang magkakamali, aking kaibigan

at talagang sarili mo'y iyo nang sisisihin

tingnan mo muna bago gamitin, ang bilin ko lang

- gregoriovbituinjr.

09.21.2022

Inihaw na tahong

kaysarap ng inihaw na tahong

na inihain sa aming pulong

na mula sa dagat ng linggatong

ng samutsaring paksang umusbong

kung naroong mangga'y manibalang

kung buwan ay maghulog ng sundang

kung lumabas ang kawan ng balang

kung gumagala'y may pusong halang

kaysarap ng inihaw na tahong

habang kayrami ng mga tanong

iba'y pakitang-gilas sa dunong

sa balitaktaka'y di umurong

- gbj/09.18.2022

Alon

pagyapak sa alon

sa akin lumulon

pagyakap ang tugon

sa bawat nilayon

- gbj/09.18.2022

Talukab at talukap

TALUKAB AT TALUKAP

ang talukab pala'y shell o kaha

ng alimango o kaya'y tahong

ang talukap ay takip ng mata

o eyelid, odom o tabon-tabon

dalawang salitang magkatugma

na kapwa katinig na malakas

pakinggan mo lamang ang salita

upang kahulugan ay mawatas

- gregoriovbituinjr.

09.17.2022

* mula sa UP Diksiyonaryong Filipino, pahina 1217

Pusang uhaw

PUSANG UHAW

sige lang, pusa, dapat matighaw

ang iyong nararamdamang uhaw

tubig baha man o galing kanal

kung sa uhaw ay di makatagal

buti naman at naiinom mo

ang bigay ng kalikasang ito

tubig mang mula ulan o bagyo

ay makakatighaw ngang totoo

habang ako nama'y nanonood

na pagmasdan ka'y kinalulugod

galing man ang tubig sa alulod

ay nakainom kang di hilahod

di ka tulad naming mamamayan

na boteng tubig, bibilhin naman

mahal man ang presyo'y babayaran

mawala lamang ang kauhawan

- gregoriovbituinjr.

09.13.2022

* nakunan ng bidyo ang pusang ito sa isang bangketang nadaanan ng makatang gala

* tingnan ang bidyo sa https://www.facebook.com/100076390892462/videos/758842921844382

Umaga umuga, umiga ang sapa

UMAGA UMUGA, UMIGA ANG SAPA

UMAGA nang lindol naramdaman

tila ba iyon na'y katapusan

UMUGA ang buong kalupaan

hanap agad ay makakanlungan

UMIGA ang sapa't lalamunan

ang mga hayop ay atungalan

gunita sa isang lalawigan

na gagawin ay di ko malaman

lalo na't tila pinagsakluban

na noon ng lupa't kalangitan

ah, mag-ingat tayo, kababayan

ang ganito'y ating paghandaan

- gregoriovbituinjr.

09.13.2022

Sa basurahan

SA BASURAHAN

may basurahan palang tapunan

ngunit nagtatapon ka sa daan

bakit? wala ka bang pakialam?

dahil ba di mo iyan tahanan?

sa tahanan ba'y maayos naman?

di mo ginagawang basurahan?

kalat dito, doon, at kung saan

para bang wala kang pakiramdam

pag walang basurahan, ibulsa

huwag magtapon ng basta-basta

sa basurahan lang magtapon ka

na dapat tayo'y may disiplina

tulungan natin ang kalikasan

pagandahin ang kapaligiran

basura'y doon sa basurahan

di sa pasilyo, daan, saan lang

- gregoriovbituinjr.

08.25.2022

Paglalaba sa kanal

PAGLALABA SA KANAL

binidyuhan ko lang nang makita

ang isang matandang naglalaba

sa tubig ng kanal, sa bangketa

dahil tubig ba'y libre talaga?

kita kong malakas ang pag-agos

ng tubig, baka kaya nilubos

ng matanda, paglaba'y rinaos

lalo't sa buhay siya'y hikahos

bakit kanal ang nilabhang lubha?

nitong matandang tingnan mo't dukha?

kawawang buhay ng maralita

baka wala pang bahay si Tanda

ayoko pang tingnan siyang baliw

kundi sa pagbidyo pa'y naaliw 

matandang kapara'y basang sisiw

na marahil iniwan ng giliw

- gregoriovbituinjr.

08.09.2022

* ang bidyo na 15 segundo ang haba ay nasa kawing na: https://fb.watch/eOd7NSrM28/

Upos sa paso

UPOS SA PASO

sa palengke'y nagtungo ni misis

nabili'y isang tumpok na isda

okra, itlog, sangkilong kamatis

nang may makitang ikinabigla

ang paso'y ginawang basurahan!

halamanang nilagyan ng upos

matapos magyosi'y gayon lamang

matapos sa hitit nakaraos

tanong ko lang, upos ba'y pataba?

o di mabulok tulad ng plastik?

gawain itong kahiya-hiya

na upos sa paso pinipitik

basura'y saan wastong ilagak?

ay, di mapalagay yaring isip

tila ba sugat ko'y nag-aantak

kalikasa'y paano masagip?

- gregoriovbituinjr.

07.31.2022

Kepler 186f

KEPLER 186F

may nakitang planetang kapara raw ng daigdig

anang mga astronomo sa kanilang saliksik

natagpuan ang planetang Kepler, mayroong tubig

na marahil may nabubuhay ding ating kawangis

"There is no planet B!" sigaw ng mga aktibista

walang makapapalit sa mundong nilakhan nila

kayâ kung may natagpuang mundong sa atin gaya 

dapat pang suriin kung may nabubuhay talaga

bakit mundo'y sinisira't naghahanap ng bago

pinabilis ang pagbabago ng klima ng mundo

pulos coal plant, pagmimina, bundok ay kinakalbo

kalsada't dagat ay pinagtatapunang totoo

ngayong may panibagong planeta silang nahanap

bubuo ba tayo roon ng lipunang pangarap?

o kaya'y sistemang walang mayaman at mahirap?

o alagaan ang tanging mundo't tahanang ganap?

- gregoriovbituinjr.

07.26.2022

Ipipinta ko

IPIPINTA KO

kung tutularan ko si Da Vinci

aking gagawing kawili-wili

ang mga tula kong hinahabi

upang ihandog sa kinakasi

kung tutulara'y si Van Gogh naman

ilalarawan ko ang lipunan

ng laksang dukha't mayamang ilan

patungo sa pagbabagong asam

ako'y ipinanganak ni Inay

nang si Marcel Duchamp ay namatay

pintor siyang kaygaling ng kamay

Oktubre Dos, kami'y nagkasabay

siya'y nawala, ako'y nabuhay

aking ipipinta sa salita

ang asam ng uring manggagawa

aking ipipinta sa kataga

ang kalikasan, gubat at sigwa

ipipinta'y adhika't pangarap

pawis at amoy na nalalanghap

ipipinta sa kapwa mahirap

ang ginhawang dapat nalalasap

- gregoriovbituinjr.

07.19.2022

Upos

UPOS

parang kandila pag sinindihan

upang hititin ng nagninilay

mamaya'y liliit ng tuluyan

ang yosing may kasiyahang bigay

ang natirang ipit ng daliri'y

sa kung saan na lang ipinitik

sa daan, pasilyo, di mawari't

ginawa ng buong pagkasabik

ah, matapos sunugin ang baga't

paliparin ang usok sa hangin

at itaktak ang titis sa lupa

ginhawa'y panandalian man din

ikinalat na upos sa daan

ay salamin ng ating lipunan

- gregoriovbituinjr.

07.18.2022

Tsiismis ay alimuom

TSISMIS AY ALIMUOM

tsismis ay alimuom, anang Rio Alma

sa isang sanaysay niyang aking nabasa

na iniulat naman ni Ambeth Ocampo

na sa ngayon ay binabanatan nang todo

mas matindi pa raw sa pakpak ng balita

yaong alimuom, sabi pa ng makata

singaw galing sa lupa matapos ang ambon

o ulan, tsismis ay lumitaw ding ganoon

historya'y tsismis daw, anang isang Ella Cruz

tila ba turo sa paaralan ay kapos

dapat sa historya'y may fact check at batayan

di basta narinig, iyon na'y kasaysayan

ah, dalawang iyon ay dapat pag-ibahin

di tsismis ang kasaysayan ng bayan natin

maraming dapat gawin kung ganyan ang batid

ng henerasyon ngayon, kilos na, kapatid

- gregoriovbituinjr.

07.18.2022

Talasalitaan:

* alimuom - singaw na galing sa lupa pagkatapos ng ulan o ambon, mula sa UP Diksiyonaryong Filipino, p. 34

* tsismis - mula sa Espanyol na chismes, kaswal na usapan o balita hinggil sa ibang tao, karaniwang kaugnay ng mga detalyeng hindi kumpirmadong totoo, UPDF, p. 1279

Lanta

LANTA

kung ako'y dahon nang nalalanta

matatanggal na ako sa sanga

katandaan ay narating ko na

matatapos na yaring pagbaka

sinubukan noon ng amihang

ako'y tanggalin sa kinalagyan

kaytibay ko sa pinagkapitang

sanga't talaga ngang nanindigan 

kay Inang Kalikasan ay dahong

nakipagtagalan sa panahon 

ako'y dahong nakibaka noon

na pagkalanta'y inabot ngayon

hintay na lang matanggal sa tangkay

upang sa lupa na'y humingalay

pagkalanta ko'y 'wag ikalumbay

at may uusbong ding bagong buhay

- gregoriovbituinjr.

07.17.2022

Tanaga sa upos

TANAGA SA UPOS

ang nagkalat na upos

sa paligid na'y ulos!

solusyon bang papatos

ay sangkaterbang kutos?

- gregoriovbituinjr.

07.13.2022

* tanaga - taal na tulang may pitong pantig bawat taludtod

Pagkatha

PAGKATHA

di ako tumutula / para sa sarili lang

at kung pangsarili lang / ay di ako tutula

at kung di makatula, / bakit ba diwa'y lutang

sa langit ng kawalan, / loob ko'y di payapa

bakit sa aking budhi'y / mayroong sumisilang

na samutsaring paksang / minsa'y di matingkala

tila ba mga luhang / sa dibdib naninimbang

paano pipigilin / kung di ko masawata

may tumutubong damo / maging sa lupang tigang

tinutula ko'y buhay / ng madla't kapwa dukha

may tumutubong palay / sa bukid na nalinang

adhika ng pesante't / obrero'y tinutula

ang binhi niring wika'y / sa loob nakaumang

na pag naglaho'y tila / baga mangungulila

pawang buntong hininga / lalo't may pagkukulang

na di dalumat hanggang / ako'y naglahong bula

- gregoriovbituinjr.

07.13.2022

Upos

UPOS

nauupos akong di mawari

sa nagkalat na paunti-unti

hanggang tumambak na ng tumambak

na kalikasan na'y nag-aantak

sa sugat na ating ginagawa

pagkasira niya'y nagbabanta

nagkalat na sa mga lansangan

at sa ating mga katubigan

sa mga isda'y naging pagkain

mga tao isda'y kakainin

paano tayo makakaraos

sa nagkalat na nakakaupos

- gregoriovbituinjr.

07.06.2022

Bagtas

BAGTAS

isang tanghali'y naglakad-lakad

sa isang lungsod na tila gubat

sa kainitan ay nabibilad

mabuti't di muling namulikat

maglakad ba'y magandang diskarte

naiisip na di mapakali

o gawa ng walang pamasahe

yaong binubulong sa sarili

sa basag-ulo'y muntik malumpo

kaya ngayo'y nag-eehersisyo

katawa't binti'y naeensayo

aba'y pampalakas pa ng buto

napili nang tahakin ang landas

na payapa't bihirang mabagtas

mabuti ang puno, walang dahas

matipuno, may dahong di lagas

- gregoriovbituinjr.

07.05.2022

Upos

UPOS

may namumuti sa aspaltadong 

kalsadang animo'y mga pekas

na di man lang pansinin ng tao

na sa kalikasa'y umuutas

taktak dito't doon, ay, magmuni

saan nga ba ang wastong tapunan

pinitik lang matapos magyosi

lansanga'y ginawang basurahan

sa balita, pangatlo ang upos

sa basurang naglutang sa laot

kung makina'y maimbentong lubos

na sa ganyang problema'y sasagot

baka sa upos, may magawa pa

lalo na't binubuo ng hibla

barong ay mula hibla ng pinya

lubid ay sa hibla ng abaka

pag-isipan anong tamang solusyon

hibla ng upos, gawing sinturon?

sapatos, bag, ito sana'y tugon

upang laot di ito malulon

- gregoriovbituinjr.

07.02.2022

Sa Daang Mulawin

SA DAANG MULAWIN

ako si Agilus at siya naman si Alwina

sa mundo ng mga Mulawin ay magkapareha

sa daigdig ng mga taong ibon sumisinta

ngunit handang magtanggol laban sa mga Ravena

minsan ay napapunta ako sa Daang Mulawin

sa isang lalawigang doon nagnilay-nilay din

ng samutsaring nangyari't paksa sa mundo natin

na nagpatibay sa aking prinsipyo't adhikain

payak lamang ang hinahangad ko sa iwing buhay

na aking Alwina'y makasama sa tuwa't lumbay

na karapatang pantao't hustisya'y kamting tunay

na uring manggagawa sa layon ay magtagumpay

narito man sa Daang Mulawin, may nalilirip

punong mulawin ay alagaan nati't masagip

laban sa kapitalismong tubo ang sinisipsip

pagdurog sa sistemang bulok na'y di panaginip

- gregoriovbituinjr.

06.30.2022

Paskil

PASKIL

nadaanan kong muli ang paskil

kaya naroong napapatigil

baligtad ba'y ginawa ng sutll?

basura'y lipana't di matigil

paalala nga'y "Bawal magkalat"

habang pader ay tadtad ng sulat

na tila may isinisiwalat

na kung titiga'y di madalumat

O, kalikasan, kapaligiran!

magtatanghal pa ba sa lansangan?

baka, kung di maalibadbaran

sa paligid na panonooran

huwag magkalat, dapat mabatid

pagnilayan ang mensaheng hatid

madaling maunawa, kapatid

na maraming bagay ay di lingid

upang di tayo mapariwara'y

dinggin naman yaong paunawa

upang kung dumaan man ang sigwa'y

di malunod sa basura't baha

- gregoriovbituinjr.

06.29.2022

Dagok

DAGOK

paano ba natin ginagalang ang mambabasa

kung kathang tula sa kanila'y nakakaumay na

may isyu't mensahe kang nais mong mabatid nila

subalit tula mo'y may talinghaga't kariktan ba?

may adhikain ang makatang isinasabuhay

sa ilalim ng tanglaw ng musa napagninilay

na bago pa siya hiranging kalaban at bangkay

mensahe'y ipaalam, masa'y pakilusing tunay

kalikasan, kapaligiran, kariktan, katwiran 

talinghaga, manggagawa, nagdaralita, bayan

lansangan, karapatan, katarungang panlipunan

sinuman, anuman, saanman, paano, kailan

bihirang may mag-like sa mga tula ko sa pesbuk

tanda bang ako'y dapat tumigil, di ko maarok

patuloy lang ako sa pagkatha, ito ma'y dagok

baka may mamulat sa sistemang di ko malunok

- gregoriovbituinjr.

06.26.2022

Nauupos

NAUUPOS

naupos ako't kayraming upos

na sa paligid ay di maubos

kalikasa'y nakawawang lubos

tila ba tayo na'y kinakalos

upos na tila ba anong lupit

sa laot ng linggatong ay dapit

na di maawat ang makukulit

tapon ay upos na humahaplit

kailan ba ito magwawakas?

upang kalikasa'y mailigtas

tila mundo'y nagkalugas-lugas

na di batid paano malutas

buti't ginagawan ng paraan

na pansamantalang kalutasan

tulad ng paglikha ng titisan

o ashtray na upos ay tapunan

tayo kaya'y bakit urong-sulong?

sa isyung ito'y di makatulong?

yaring problema'y saan hahantong?

kung di malutas ng marurunong

- gregoriovbituinjr.

06.26.2022

Alagata

ALAGATA

pumatak na naman ang ulan habang nakikinig

ng talakayan sa zoom na halos di na marinig

ang tagapagsalita sa tinuran niyang tindig

hinggil sa ilang isyung pambayan at pandaigdig

may bagyo ba? anong pangalan? hanggang pinasok ko

ang mga damit na nakasampay sa labas, dito

ko naalagata paano tutugon ng wasto

hinggil sa papainit na klima sa ating mundo

isinuot ko ang naitagong pantalong kupas

na alaala ng kabinataan kong lumipas

habang pang-itaas ay kamisetang walang manggas

nasa diwa yaong pagtahak sa putikang landas

gabi, naririto't di pa rin dalawin ng antok

ang pusa'y nag-aabang sa labas, may inaarok

ako, mailalagay kaya ang dukha sa tuktok?

marahil, kung mapapalitan ang sistemang bulok

- gregoriovbituinjr.

06.23.2022

Kailangan ka

KAILANGAN KA

bayani ay kailangan

ng ating kapaligiran

at daigdig na tahanan;

ikaw ba'y isa na riyan?

daigdig ay gawing lunti

basura'y di maging gawi

baluktot ay mapapawi

kung iwawasto ang mali

sinong magtutulong-tulong

kundi tayo-tayo ngayon

buti ng mundo'y isulong

tungkuling napapanahon

kung gawin ang sinasabi

upang sa mundo'y mangyari

ang dito'y makabubuti 

Igan, isa kang bayani

- gregoriovbituinjr.

06.22.2022

Alapaap

ALAPAAP

madalas ay napapatingala

upang titigan ang alapaap

na ang hubog ay kaygandang sadya

nais tuloy marating ang ulap

baka naroroon ang diwata

magandang musang nasa hinagap

inaawitan ang mga tala

habang pipit ay sisiyap-siyap

sa toreng garing, makata'y wala

nasa putikang sisinghap-singhap

kasama ang dukha't manggagawa

lipunang makatao ang hanap

may tungkuling gagawin sa bansa

paano lalabanan ang korap

paano durugin ang kuhila

at pagkaisahin ang mahirap

narito akong nakatingala

habang kandila'y aandap-andap

gamugamo'y biglang nangawala

nasunog ang pakpak sa sang-iglap

- gregoriovbituinjr.

06.21.2022

Puna

PUNA

sementado na nga, papatungan pa ng aspalto

dahil ba katapusang buwan na nitong pangulo?

kaya kailangang gamitin ang natirang pondo

dahil pondong di ginamit, isasauli ito

kaya kahit sementado na ang nasabing daan

upang magamit ang pondo'y mag-aaspalto naman

imbes ibigay bilang ayuda sa mamamayan

gumawa ng proyektong di pa naman kailangan

anong epekto sa mamamayan ng ganyang gawa?

pag umulan, bumagyo o nanalanta ang sigwa

tataas ang kalsada't sa bahay na magbabaha!

di ba nila naisip ang kanilang malilikha?

sementado na, aaspaltaduhin pa, ay, astig!

aba, iyan ang pagtingin ko, ha, di nang-uusig

ay, huwag ka sanang masaktan sa iyong narinig

pondo ng bayan, gamiting tama, huwag manglupig!

- gregoriovbituinjr.

06.21.2022

Sunken garden

SUNKEN GARDEN

kaysarap na tambayan ang paligid na mapuno

dinig mo ang mga kuliglig sa pag-aawitan

animo kuliglig ay naghahandog ng pagsuyo

sa kasintahan o marahil sa sangkatauhan

kaylinis dito't anong sarap ng simoy ng hangin

tila walang kalat maliban sa balat ng kendi

kaysarap magpahinga't nakaraan ay nilayin

tulain ang karanasan gaano man katindi

tila ba nasa kanayunan at ako'y malusog

tila ba walang karamdaman o anumang sakit

narito ako sa gubat sa lungsod, aking irog

paligid ay dinaramang nakatitig sa langit

sa panahong ganito, itinutula'y pag-ibig

sa ibang panahon, itinutula'y isyu't tindig

- gregoriovbituinjr.

06.18.2022

Dalawang puno

DALAWANG PUNO

animo'y binti ng kapre

ang mga naroong puno

na sa aking guniguni

ay bigla namang naglaho

totoo kayang may kapre,

manananggal at tikbalang?

gaano sila kalaki?

sila ba'y may pusong halang?

nakunan ko ng litrato

ang dalawang punong iyon

dahil iba ang sipat ko

gana ng imahinasyon

namalikmata na naman

sa pagpitik ng kamera

di ba nagulumihanan

sa mga pinagkukuha?

- gregoriovbituinjr.

06.18.2022

Boteng plastik

BOTENG PLASTIK

mga walang lamang boteng plastik

nakita kong doon nakasiksik

sa diwa ko'y tila itinitik

kaytagal kung gagawing ekobrik

marahil gawing paso't pagtamnan

ng binhi't palaguing halaman

tamnan ng gulay, gawing gulayan

okra, munggo, sitaw, o anuman

basurang plastik na'y tambak-tambak

sa mundong tila ginawang lusak

plastik ba'y saan dapat ilagak?

ibalik sa pabrika ang linsyak!

isang pansamantalang solusyon

ang ekobrik na gawa ko ngayon

minsan, nakakatamad na iyon

lalo't mag-isa lang ako roon

magandang bukas nitong daigdig

ang layon ko kaya aking ibig

makatulong gamit yaring bisig

mundo'y sagipin ang aking tindig

- gregoriovbituinjr.

06.16.2022

* litratong kuha ng makatang gala sa opis na pinupuntahan

Strawberry moon

STRAWBERRY MOON

gaano kaygandang pagmasdan ang Strawberry Moon

magkukulay strawberry kaya ang buwan ngayon

ngunit maulap ang kalangitan, panay ang ambon

magbakasakali tayo, abangan pa rin iyon

ihanda ang mga mata, pati iyong kamera

bakasakali lang na makunan mo ng maganda

o kaya'y tandaan, ilarawan sa alaala

at baka may makatha ka pang tula o istorya

O, Strawberry Moon, pagdalaw mo'y makasaysayan

anong hiwagang mayroon na dapat kang pagmasdan?

lalo sa aking plumang may kung anong hinahawan

pag-iral mo sa siyensya ba'y anong kahulugan?

karagatan ba'y taog muli pag nagpakita ka?

o sa Musa ng Panitik ay inspirasyon kita?

daraan ba'y matinding sigwa kaya nagpakita?

o tulad ng Strawberry, may masaganang bunga?

- gregoriovbituinjr.

06.14.2022

* taog - high tide

* batay sa balita ni Mang Tani Cruz sa GMA7

Pita

PITA

dinggin mo ang tinig
ng ating daigdig;
kung pulos ligalig,
wala bang pag-ibig?

tingni ang alindog
ng dagat at ilog;
sa basura'y lubog
ang mundo kong irog.

halina't magtanim
ng punong malilim,
ng adhikang atim,
ng pagsintang lihim.

ating alagaan
ang kapaligiran
at ang kalikasang
dapat mapagyaman.

haynaku, haynaku!
di po ito hayku..
ang panawagan ko
sana'y dinggin ninyo

ang hanap ng ibon
ay saan hahapon
sa sangang mayabong
o kawad lang doon?

- gregoriovbituinjr.
06.12.2022

Ang pokpok

ANG POKPOK

mababa rin kaya ang lipad ng nasabing Pokpok

iyon ang tawag sa ibong animo'y kumakatok

ngunit huni pala iyong tila ba nanghihimok

na sa kanyang lungga tumuloy sinumang nalugmok

upang bigyan niya ng tunay na kaligayahan

upang nararanasang lumbay ay makalimutan

upang madama ang luwalhati sa kalangitan

upang ipinagbabawal daw ay iyong matikman

maagang bahagi pa lang ng buhay ko'y naakit

sa mga pokpok na pag iyong nakita'y kayrikit

tila baga ibong ito iwing puso'y binitbit

upang sa saya'y dinggin ang maingay niyang awit

O, pokpok, gaano ba kababa ang iyong lipad

upang mga nangalulungkot ikaw ay mahangad

upang sa alay mong pagsinta sila'y magbumabad

ang tunay mo bang layunin ay iyong inilantad

- gregoriovbituinjr.

06.06.2022

* litrato mula sa artikulong "Meet the Pokpok: A Noisy and Colorful Bird of the Philippines" na nalathala sa esquiremag.ph

Tula sa WED2022

SA DAIGDIGANG ARAW NG KAPALIGIRAN

kayraming gagawin, masdan mo ang kapaligiran

pakinggan ang awitin ng Asin sa kalikasan

polusyon, upos, plastik, basura, klima rin naman

sa mga suliraning ito'y anong kalutasan

kayrumi ng Ilog Pasig, ng karagatan natin

nakakalbo ang kagubatan, halina't magtanim

kayraming isyung dapat isipin anong gagawin

tulad sa Marcopper na nawasak yaong lupain

Ondoy, Yolanda, climate change, matitinding daluyong

pang-unawa't pagbibigkis nga'y dapat maisulong

maraming magagawa, lalo't magtutulong-tulong

lalo't bukás ang isipan sa isyung patung-patong

ngayong World Environment Day, ikalima ng Hunyo

tinakdang petsa para sa kalikasan at tao

ang nagbabagong klima'y nararamdamang totoo

isyu rin ang plantang coal at pagmimina sa mundo

makiisa na sa pagkilos laban sa plantang coal

isang sanhi kaya klima'y nagkakabuhol-buhol

sa pagtatayo ng dambuhalang dam na'y tumutol

buhay at kultura ng katutubo'y ipagtanggol

di na dapat paabutin pa sa one point five degree

ang pag-iinit nitong mundo, huwag isantabi

ang isyung ito't talagang di na mapapakali

maraming lulubog na isla pag ito'y nangyari

sa laot, kinakain na ng isda'y microplastic

ah, di na mabilang ang upos at basurang plastik

naggugupit na ng plastik upang gawing ekobrik

pagbabakasakali rin ang proyektong yosibrik

ngayong World Environment Day, pag-isipan nang lubos

ang mga isyung nabanggit, tayo na'y magsikilos

para sa kinabukasan, bayan at masang kapos

upang sa mga isyung ito, tao'y makaraos

- tula't litrato ni gregoriovbituinjr.

06.05.2022

Pagmumuni

PAGMUMUNI

I

patumpik-tumpik pa rin sa gaod

habang nananakit ang gulugod

nasa balsa'y nagpapatianod

aba'y di ito nakalulugod

kundi'y sabay-sabay malulunod

kung basta na lang maninikluhod

sa naghahari-hariang "lingkod"

nasa tabing-tabi'y di umisod

II

babasahin ko ang pangungusap

ng makatang lumaki sa hirap

baka makuha sa isang iglap

ang taludtod niyang hinahanap

baka maluha sa isang irap

ng dalagang aking pinangarap

buhay ko man ay aandap-andap

ngunit ayokong kita'y maghirap

III

nais kong mag-araro sa bukid

kasama yaong mga kapatid

kahit paano'y may nababatid

nang gutom ay tuluyang mapatid

anong sarap ng amihang hatid

ng hanging sa akin makaumid

ay makakalikha rin ng lubid

pag pinagsama'y laksang sinulid

IV

sa putikan na nga nagtampisaw

yaong kaysipag niyang kalabaw

na nag-araro ng buong araw

habang uhay ay nagsisisayaw

buti't binti na'y naigagalaw

kanina, pulikat ay humataw

mabuti nang salawal ay lawlaw

huwag lamang binabalisawsaw

- gregoriovbituinjr.

06.03.2022

Alimpungat

ALIMPUNGAT

di ako makaparada roon

habang pinuputakti ng lamok

yaring sugat kong namuo noon

nang magbalantukan na'y umumbok

guniguni'y pawang pangitain

na pakiramdam ko'y di maatim

habang kayrami nila sa hardin

doon nagsisiksikan sa lilim

bigla akong naaalimpungat

sa mga nag-indakang liwanag

tila walang tulog, ako'y puyat

subalit nanatiling matatag

anila, aanhin pa ang damo

naalala habang nakatungo

kung namatay na raw ang kabayo

aral bang ito'y saan nahango

maliligtasan din ang pandemya

at anumang kaharaping sigwa

bantayan ang nagbabagong klima

sa panahong ating iniinda

- gregoriovbituinjr.

06.03.2022

Pagmumuni

PAGMUMUNI

nakatitig muli sa kawalan

nakatingala sa kalangitan

nangyayari sa kasalukuyan

ay may ugnay sa kinabukasan

ang tubig sa aplaya'y mababaw

ramdam ng katawan ko ang ginaw

unang punta ko lang sa Anilao

ngunit kayrami ko nang nahalaw

aralin sa dinaluhang pulong

sa zero-waste na malaking tulong

nakasalamuha'y marurunong

nagbahagi ng kanilang dunong

dinig ko ang alon sa aplaya

tila dinuduyan ang pandama

buti na lang, kasama ang sinta

nagtampisaw doong buong saya

- gregoriovbituinjr.

05.29.2022

Sa Anilao

SA ANILAO

gumaling sa tubig ng Anilao

ang matagal kong inindang pilay

sa balikat, kaytagal nang ngalay

na akin ngayong naigagalaw

O, maraming salamat sa dagat

sa nakagaling na tubig-alat

naitataas na ang balikat

na dati'y masakit kung iangat

at sa wakas ay nailatag ko

sa pulong ng zero waste ang isyu

lalo na't yosibrik kong proyekto

nang malutas ang upos na ito

kahit papaano'y may pumansin

proyekto kong munti'y dininig din

sa ka-adbokasya'y naitanim

ang isang isyung dapat lutasin

imbitado'y si misis sa pulong

at ako'y salimpusa lang doon

subalit sumama na sa layon

na yosibrik man ay makatulong

O, Anilao, salamat pong muli

sa pulong natalakay ang mithi

balikat pa'y gumaling ng sidhi

habang masid, kariktan mong lunti

- gregoriovbituinjr.

05.29.2022

* dumalo ang makatang gala sa dalawang araw na pulong ng Zero Waste Philippines, Inc. (ZWPI) sa Anilao, Mabini, Batangas, Mayo 28-29, 2022

* litratong kuha ni misis

Tag-ulan na

TAG-ULAN NA

kagabi, ngayong gabi

umulan ng malakas

sa bubong ay kaytindi

tila ba nandarahas

misis ay nagbunganga

nang nagkalat ang plastik

na basurang binaha

sa kalsadang nagputik

nagugulumihanan

sa nasalantang gamit

binaha kasi naman

tiyan na'y naghihigpit

ngayon nga'y tag-ulan na

kaya kita'y mag-ingat

baka maabutan pa

ng tabsing na kay-alat

- gregoriovbituinjr.

05.27.2022

Gamugamo

GAMUGAMO

pinatay ko ang ilaw sa silid

nang gamugamo'y nangaglipana

kaya di na sa atin nalingid

na ulang matindi'y daratal na

ganoon sila, aking napansin

binuksan ko ang ilaw sa banyo

kawan silang nagsisuguran din

at bombilya'y pinutakting todo

lumabas muna ako ng bahay

kayrami rin sa ilaw ng poste

tila nagpipyesta silang tunay

sa nadamang laya ngayong gabi

at maya-maya lang ay umulan

naisipan kong agad umuwi

ang bubong ay nagkakalansingan

nagtungong banyo upang umihi

kawang gamugamong naroon

animo'y naglanguyan sa timba

o nangalunod ang mga iyon

anong kanilang ibinabadya

- gregoriovbituinjr.

05.27.2022

Ang kwento ng nuno

ANG KWENTO NG NUNO

mahirap maghanap ng karayom sa dalampasigan

yaong sabi ng nuno sa apo kamakailan

kahit na isa kang mananahi sa kapatagan

maliban kung may dala ka na mula patahian

namimilosopo rin paminsan-minsan ang nuno

upang mabigyang aral ang apong nakatalungko

pinagmamasdan ang alon sa di naman malayo

kanyang nuno'y pinakinggan ng buong diwa't puso

nagkwento ang nuno ng karanasan niya noon

mula bata, magbinata, mag-asawa paglaon

sinariwa ang mga saya't dusa ng kahapon

ng digma, ng unos, ng pagtutunggali sa alon

kanya bang mga kwento'y karunungang masasabi?

upang sa panahon ngayo'y may aral at may silbi?

lumang panahon ba'y ating basta isasantabi?

o hahalawan ng aral ang karayom ng sastre?

- gregoriovbituinjr.

05.23.2023

Kalikasan

KALIKASAN

ating kalikasan

at kapaligiran

ating alagaan

huwag pabayaan

upang salinlahi

at iba pang lipi

dukha't ibang uri

ay di mangahikbi

pagkat nawala na

kalikasang sinta

tila itinumba

ng kapitalista

at tusong hunyango

para lang sa tubo

paano mahango

ang mundong siphayo

kinalbo ang bundok

gubat ay inuk-ok

sa kita tumutok

sa bulsa sinuksok

gawin ang marapat

upang yaong bundat

sa tubo'y mapuknat

at maisiwalat

- gregoriovbituinjr.

05.23.2022

Pagtatanim

PAGTATANIM

tara, kita'y magtanim sa paso

ng binhing tagos sa diwa't puso

tara, kita'y magtanim ng puno

alagaan ng buong pagsuyo

tara, kita'y magtanim sa parang

ng binhi ng kalayaang asam

tara, kita'y magtanim sa ilang

ng binhi ng buti't may katwiran

pwede kayang magtanim sa gulong

habang sa trompa'y dinig ang bulong

subukan kung ito'y ikasulong

ng bayang problema'y patong-patong

ah, kaygandang gawa ang magtanim

lalo't lumago'y punong may lilim

tinikang rosas man ang masimsim

may ihahandog sa sintang lihim

tara, kita'y magtanim ng gulay

upang may maiulam sa bahay

di ba't ganito'y kaygandang pakay

upang walang magutom na tunay

balang araw ay may maaani

lalo't inalagaang mabuti

pagtatanim ay sadyang may silbi

sa bayan, sa pamilya't sarili

- gregoriovbituinjr.

05.23.2022

Usapan sa 2150

USAPAN SA 2150

tara, kunan natin ng litrato

yaong puno doon sa museyo

kawili-wili raw tingnan ito

nanlumo naman ang aking lolo

di kasi ito inalagaan

hanggang puno'y nawalang tuluyan

mundo'y kay-init, walang pagtamnan

ng punong sa init pananggalang

kung di nagpabaya ang ninuno

disin sana'y mayroon pang puno

paano na? ito na'y naglaho

O, tao, saan tayo patungo?

BALIK SA 2022

tumitindi ang banta ng klima

bagyo'y kaytindi kung manalasa

bundok at gubat ay nakalbo na

tuyot na ang lupang sinasaka

tara, magtanim tayo ng puno

diligan ito upang tumubo

kumilos tayo't magtagpo-tagpo

mag-usap ng puno'y di maglaho

gawin natin sa kasalukuyan

ang para na sa kinabukasan

ng sunod na salinlahi't bayan

tara, kumilos na, kaibigan

- gregoriovbituinjr.

05.20.2022

* tula para sa International Museum Day, 05.18.2022

* 2 litrato mula sa google

Talaghay

11. Talaghay - Resilience

* tara, gamitin na natin sa pagtulâ

noong panahon ng Yolanda

ay napakita raw na tunay

yaong resilience o talaghay

at doon tayo'y kinilala

ano naman ang opinyon mo

o pananaw o pagninilay

taglay nga ba ng Pilipino

itong resilience o talaghay

- gregoriovbituinjr.

05.15.2022

* saliksik mula sa kawing na:

https://www.esquiremag.ph/long-reads/features/50-beautiful-filipino-words-a00293-20210816-lfrm3

Lipunang Makatao: Sagot sa Kantang "Bagong Lipunan"

LIPUNANG MAKATAO: SAGOT SA KANTANG "BAGONG LIPUNAN"

Maikling sanaysay ni Gregorio V. Bituin Jr.

Kampanyahan pa lang ay pinatutugtog na sa trompa o MPT ng BBM ang "Bagong Lipunan". Ang kantang pinauso noong panahon ng batas-militar, noong panahon ng diktadura. At ngayong malaki ang kalamangan ni BBM kay Leni sa halalan, at pag sumumpa na bilang pangulo si BBM, tiyak muling iilanglang sa himpapawid ang kanta ng diktadura - ang "Bagong Lipunan".

Nakakasuka, pag alam mo kung ano ang awiting iyon. Ideyolohikal, kanta ng panahon ng diktadura, noong panahong maraming paglabag sa karapatang pantao, maraming tinortyur, kinulong at iwinala na hanggang ngayon ay hindi pa nakikita. Kumbaga, labanan din ito ng kultura. Kaya balikan natin ang isa pang awiting mas nararapat na kantahin ng ating mamamayan, ang "Lipunang Makatao". Lagi itong inaawit sa mga pagtitipon ng manggagawa't maralita. Lagi itong inaawit ng grupong Teatro Pabrika sa mga pagkilos, bagamat karaniwang ang salitang "kaibigan" ay pinapalitan nila ng "manggagawa". Lagi namin itong inaawit. Lagi ko itong inaawit.

Dalawang magkaibang kanta - Bagong Lipunan at Lipunang Makatao. Anong klaseng lipunan nga ba ang nais tukuyin ng magkatunggaling awiting ito? Magkaibang liriko ng awitin. Kanta upang disiplinahin ang mamamayan. Awit hinggil sa kongkretong pagsusuri sa kongkretong kalagayan ng mamamayan. Dalawang magkatunggaling awit. Labanan ng mga uri. Kapitalista laban sa manggagawa. Burgesya laban sa dukha. Trapo laban sa tinuturing na basahan. Mapagsamantala laban sa pinagsasamantalahan. Mapang-api laban sa inaapi.

Mas matindi rin ang "Lipunang Makatao" kaysa "Bayan Ko" na sinulat ni Jose Corazon de Jesus. Ang lipunan ay pandaigdigan, hindi lang pambayan. Dapat palitan ang sistema ng lipunan, hindi lang paalisin ang dayuhan. Dapat lumaya sa pagsasamantala, hindi lang paglaya sa kuko ng agila o dragon.

Ang awiting "Lipunang Makatao" ay titik ni Resty Domingo na nagwagi ng unang gantimpala sa isang patimpalak ng awit noong 1988. Awitin itong makabagbag-damdamin pag iyong naunawaan ang ibig sabihin ng awit. Talagang titindig ka para sa prinsipyo ng isang lipunang malaya at makatao, isang lipunang walang pagsasamantala ng tao sa tao.

Bilang aktibistang makata, nais kong balikan, ituro, at ipabatid sa mga manggagawa't maralita ang awit na "Lipunang Makatao" bilang pangontra sa "Bagong Lipunan". Narito po ang liriko ng awit, na sinipi mula sa cover ng cassette tape album na pinamagatang "Haranang Bayan", na inihandog ng Teatro Pabrika sa pakikipagtulungan ng Philippine Educational Theater Association (PETA), na inilunsad noong mga unang bahagi ng 1990s.

Awit:

LIPUNANG MAKATAO

Solo:

Luha'y dumadaloy sa mugto mong mga mata

Larawan mo'y kalungkutan at kawalan ng pag-asa

Magagandang pangarap sa buhay mo'y di makita

Nabubuhay ka sa panahong mapagsamantala.

Koro:

Gumising ka, kaibigan, ang isip mo'y buksan

Dapat mong tuklasin ang tunay na kadahilanan

Bakit may naghihirap na gaya mo sa lipunan

At sa dako roo'y hanapin ang kasagutan.

Tama ka, kaibigan, sila nga ang dahilan

Ang mapagsamantalang uri sa lipunan

Likhang yaman natin, sila ang nangangamkam

Na dapat mapasaatin at sa buong sambayanan.

Koro:

Tumindig ka, kaibigan, tayo nang magpasya

Panahon nang wakasan ang pagsasamantala

Sa diwa ng layunin tayo'y magkaisa

Lipunang makatao'y itindig ng buong sigla

Buong Sigla.

(Instrumental)

(Acapela ng koro)

(Ulitin ang koro kasama ng instrumento)

Tumindig ka, kaibigan, tayo nang magpasya.

Salin ng My Desiderata ni Ka Sonny Melencio

Ang Aking Ninanais (My Desiderata)

[Pasintabi kay Max Ehrmann (1872-1945)]

ni Ka Sonny Melencio

Malayang salin ni Gregorio V. Bituin Jr.

* Desiderata - wikang latin sa "desired things"

Mapoot ka sa kabila ng ingay at pagmamadali, at tandaan anong kapayapaan mayroon sa pagtutol.

Hangga’t kakayanin, huwag susuko, makitungo ng maayos sa lahat ng inaapi.

Sabihin mo ng malakas at malinaw ang iyong katotohanan; at makinig sa masa, maging sa api at walang alam; sila’y may kanya-kanyang pakikibaka at kwento.

Iwasan ang maingay at agresibong trapo; nakakainis sila sa lahat. Kung ihahambing mo ang iyong sarili sa iba, ito’y upang matagpuan lamang ang pakikiisa sa kanila, dahil palaging may mas dakila’t mahusay na taong mababahaginan mo n mga pangarap at layunin.

Masiyahan sa iyong mga nakamit pati na rin sa iyong mga balakin. Panatilihing interesado sa kalagayan ng iba, gaano man kabigat at mahirap; tunay itong mapanghahawakan sa nagbabagong kapalaran ng panahon.

Mag-ingat sa iyong mga pampulitikang gawain, lalo’t puno ng panlilinlang at pandarambong sa daigdig. Ngunit hayaan itong nakahiwalay sa iyo sa kung anong makasariling katangian mayroon ito; nagsusumikap ang maraming tao para sa matataas na mithiin at prinsipyo, at saanpaman, ang buhay ay punong-puno ng pakikibaka at kabayanihan.

Maging tao ka sa iyong kapwa. Lalo na’t huwag magkunwang gumigiliw. Ni maging mapang-uyam sa pakikibaka; sapagka't sa harap ng lahat ng kapighatian at kawalang-kasiyahan, magiging kapara ng damo ang tagumpay.

Tanggapin mong mabuti ang payo ng mga mandirigma sa harap mo, isuko ang lahat ng walang kabuluhang bagay ng kabataan. Pangalagaan ang lakas ng iyong diwa upang malabanan ang anumang daratal na kasawian.

Datapwat huwag pahirapan ang iyong sarili sa madilim na akala. Maraming takot ang nagmula sa pagkapagod at pagkamakasarili.

Higit pa sa matinding disiplina, maging magalang sa iyong sarili at sa kapwa. Kayong lahat ay mga anak ng sansinukob, kung ihahambing sa mga puno at mga bituin; lahat kayo’y may karapatang maging naririto. Malinaw man ito sa iyo o hindi, ang lahat ng sangkatauhan at ang buong sansinukob ay dumaratal sa harap mo.

Kaya makiisa sa sambayanan, saan man sila matagpuan. At anuman ang iyong mga pinaghirapan at adhikain, sa mabigat na kaguluhan ng buhay, hanapin ang kapayapaan sa pakikibaka.

Linisin ito sa lahat ng kasamaan, pang-aapi, at karahasan, upang ito‘y maging magandang daigdig. Tumutol, makibaka, at maging masaya.

Mayo 2022

.

.

.

MY DESIDERATA

(Apology to Max Ehrmann)

by Ka Sonny Melencio

Go rage amid the noise and the haste, and remember what peace there is in resisting.

As far as possible, do not surrender, be on good terms with all the oppressed people.

Speak your truth loudly and clearly; and listen to the masses, even to the downtrodden and the ignorant; they all have their struggle and story.

Avoid loud and aggressive trapos; they are vexatious to everyone. If you compare yourself with others, it is only to find solidarity with them, for always there will be greater and better persons to share your dreams and goals.

Enjoy your achievements as well as your plans. Keep interested in others’ situation, however ardous and difficult; it is a real possession in the changing fortunes of time.

Exercise caution in your political affairs, for the world is full of trickery and thievery. But let this not bind you to what selfish virtue there is; many persons strive for high ideals and principles, and everywhere, life is full of struggle and heroism.

Be a human being for others. Especially do not feign affection. Neither be cynical about the struggle; for in the face of all adversity and disenchantment, victory will be as perennial as the grass.

Take kindly the counsel of fighters before you, surrender all trivial things of youth. Nurture your strength of spirit to combat sudden misfortune.

But do not distress yourself with dark imaginings. Many fears are born of fatigue and selfishness. 

Beyond a strong discipline, be gentle with yourself and with others. You are all children of the universe, no less than the trees and the stars; you all have a right to be here. And whether or not it is clear to you, all humanity and the entire universe are unfolding before you.

Therefore be in solidarity with the masses, wherever you face them to be. And whatever your labors and aspirations, in the grueling turmoil of life, find peace in the struggle. 

Cleanse it of all evil, oppression, and violence, so it will be a beautiful world. Resist, struggle, and be happy.

May 2022

Plataporma

PLATAPORMA NG ATING MGA KANDIDATO

minsan, isang hamon ang pagsusulat ng plataporma

ng patula, lalo na sa pantigang labinlima

upang maisagawa ito'y talagang binasa

ang plataporma ng ating kandidatong talaga

hinabi ang mga salita habang nakatitig

sa mga patay na letrang bubuhayin ng tinig

ng pasulat, ng pabigkas, ng pagkakapit-bisig

upang mabatid ng bayan ang isyu't ating tindig

disente't abot-kayang pabahay sa mamamayan

sapat na panlipunang serbisyong pangkalusugan

pagbaka sa diskriminasyon sa kababaihan

may kumprehensibo't sustenableng City Land Use Plan

abot-kaya ang presyo ng pangunahing bilihin

suporta sa mga kababaihan, single parent

suporta sa may kapansanan at senior citizen

murang tubig at kuryente sa mamamayan natin

buwagin ang mga manpower agencies na iyon

upang tiyak na matigil ang kontraktwalisasyon

buwagin ang liberalisasyon, deregulasyon

at pribatisasyon na dulot ng globalisasyon

tunay na security of tenure law ay gawin na

proteksyon sa unyon, karapatang mag-organisa

public protection guarantee sa mayorya ng masa

gobyerno ang magbibigay ng trabaho sa kanila

tuluyan nang tatanggalin iyang Regional Wage Board

upang obrero'y makatanggap ng pantay na sahod

sa lahat ng probinsya kapantay sa punong lungsod

sevenfifty national living wage ang isusunod

sa mga magsasaka'y ipamahagi ang lupa

sahod na nakabubuhay sa mga manggagawa

wealth tax sa mga bilyonaryo ay marapat lang nga

tapyasin ang yaman nila't makatulong sa madla

dapat ding i-repeal na ang Rice Tariffication Law

murang bigas, kita ng magsasaka'y masiguro

i-repeal din ang mapangyurak na Anti-Terror Law

at matiyak na karapatan ay nirerespeto

fossil-fuel phase out with just transition ay gagawin

upang krisis sa klima't kalikasan ay pigilin

upang magmura ang kuryenteng ginagamit natin

renewable energy, tulad ng solar, gamitin

ang SOGIE protection bill ay dapat maisabatas

gawing legal ang diborsyo sa bansang Pilipinas

idekriminalisa ang aborsyon, isabatas

ayusin din ang mga batas na kayraming butas

itigil ng limang taon ang pagbabayad-utang

upang gamitin ang pondo sa kagalingang bayan

Automatic Appropriation Law, i-repeal naman

mag-impose ng wealth tax sa limangdaang mayayaman

tuluyan nang i-repeal ang Oil Deregulation Law

gobyerno na ang magtakda ng presyo ng petrolyo

pagbawal sa dinastiya'y gawan ng enabling law

sa korte, appointing power alisin sa pangulo

ibalik, sadyang kahulugan ng party-list system

at bilang nito sa Kongreso'y dapat paramihin

pagkapantay ng kasarian ay palaganapin

magpatupad ng proce control sa presyo ng pagkain

ah, kayraming dapat gawin upang sistemang bulok

ng naghaharing uri't kapitalismo'y mauk-ok

ayon sa isang awit, dukha'y ilagay sa tuktok

subukan ang manggagawa't bayan ay di malugmok

- gregoriovbituinjr.

04.27.2022

* Unang nalathala sa aklat na 101 Red Poetry para kina Ka Leody, Walden, at sa kanilang line-up, mp. 96-97