Uulan na naman

UULAN NA NAMAN

madilim ang kalangitan

nagbabadya ang pag-ulan

tulad ng inaasahan

tila may bagyo na naman

baka bumuhos na tunay

ang ulan kaya sinampay

agad pinasok sa bahay

habang aking naninilay:

kung may parating na sigwa

kung sakali mang bumaha

kahit paano'y maghanda

upang di rin matulala

ganyan naman taon-taon

tayo ba'y sanay na doon?

magsisimula sa ambon

hanggang lumakas na iyon

dapat batid ang gagawin

kung paano di lamunin

ng unos ang bahay natin

o saan lilikas man din

- gregoriovbituinjr.

03.09.2025

Raliyista kanina, ngayon ay labandero

RALIYISTA KANINA, NGAYON AY LABANDERO

raliyista kanina, ngayon ay labandero

ganyan nga ang aktibistang Spartan tulad ko

matapos ang rali, may iba pang misyon tayo

may mga toka roon at may toka pa rito

bukod sa bayan, pamilya'y inaasikaso

kailangang maglaba, magkusot, at magbanlaw

saka naman isusunod yaong pagsasampay

mabuti kung iyon pa'y mainitan ng araw

kasama talaga ang paglalaba sa buhay

upang may suutin pag mainit o maginaw

pag natuyo naman, tuloy ang pakikibaka

para sa makataong lipunan at hustisya

may maayos tayong suot pagharap sa masa

may respeto sa atin ang inoorganisa

mapakitang marangal ang mga aktibista

- gregoriovbituinjr.

03.08.2025

Ngayon pong Araw ng Kababaihan

NGAYON PONG ARAW NG KABABAIHAN 

ngayon pong Araw ng Kababaihan 

ako'y taaskamaong nagpupugay

sa mga ilaw ng bawat tahanan

sa lahat ng lola at mga nanay

babae kayong nagluwal sa amin

nag-alaga, nagpasuso ng gatas

nagpalaki, nagmahal, nagpakain

gabay namin sa maayos na landas

kayo'y mga asawang iniibig

di sinasaktan pagkat minamahal

kayo ang kalahati ng daigdig

kayong sa mundo'y bumuhay, nagpagal

kayo'y lola, ina, tiya, kapatid,

pinsan, kaklase, katrabaho, mare,

kayong pag-ibig ang inihahatid

kayo'y Gabriela, Oriang, bayani

salamat po sa inyong sakripisyo

mula sinapupunan, nag-aruga

maraming salamat, nariyan kayo

na mga ginawa'y sadyang dakila

- gregoriovbituinjr.

03.08.2025

* mapapanood ang bidyo sa kawing na: https://web.facebook.com/share/v/1Gpe23Vv9k/ 

97-anyos, lalahok sa rapid chess

97-ANYOS, LALAHOK SA RAPID CHESS

edad na siyamnapu't pitong anyos
ay isa nang malaking gantimpala
iyon pa kayang lalaban kang lubos
sa chess, aba'y sadyang kahanga-hanga

pagpupugay sa iyo, Tatay Domeng
na tatlong taon pa'y sandaan ka na
ilalabas mo pa ang iyong galing
sa torneo ng chess sa Marikina

nawa'y makamit mo sa iyong edad
ang unang pwesto sa larangan ng chess
pag nagkampyon ka, tunay kang mapalad
lalo't laro ng utak ang ahedres

salamat, isa ka nang inspirasyon
upang tularan ka ng kabataan
maabot ang edad mo'y aking layon
kaya sa chess ako na'y ginanahan

- gregoriovbituinjr.
03.08.2025

* ulat mula sa pahayagang Bulgar, Marso 7, 2025, p.12

Sa Araw ng Kababaihan

SA ARAW NG KABABAIHAN

pakikiisa ko'y mahigpit

sa Araw ng Kababaihan

sasama ako't igigiit

kanilang mga karapatan

bukas ay dadalo sa rali

upang ipagdiwang ang Araw

ng magigiting na Babae

at sila rin ang bumubuhay

sa mamamayan ng daigdig

silang kalahati ng mundo

sila ang pusong nagpapintig

sa akin, sa masa, sa tao

lola, ina, tiya, kapatid,

asawa, kasintahan, guro,

sa bawat babae ang hatid

ko'y pagpupugay, buong-buo

at sa Dakilang Araw nila

kalalakiha'y kikilos din

kapitbisig at sama-sama

na lipunang ito'y baguhin

- gregoriovbituinjr.

03.07.2025

Pag-ambag ng dugo

PAG-AMBAG NG DUGO

bilang aktibista, nais kong makatulong

sa aking kapwa, kahit magbigay ng dugo

para sa nangangailangan, nilalayon

kong ang masa'y maging malusog, di tuliro

makapag-ambag ng dugo'y magandang gawâ

di lang pulos pakikibaka sa kalsada

malaking tulong sa karaniwan mang dukhâ

lalo na't dugo pala'y kailangan nila

simpleng gawa, simpleng misyon sa sambayanan

kaya nang sa Farmers, Cubao ay makita ko 

na may Blood Donation Drive ay nagkusa naman

bilang tibak ako'y agad nagboluntaryo

upang sa sinuman dugo ko'y maisalin

dahil saksi ako sa aking misis noon

sa ospital, sa unang araw pa lang namin

dugong tatlong bag sinalin kay misis doon

kaya pagbibigay ng dugo'y naidagdag

sa aking misyon dito sa mundong ibabaw

kaysarap sa pakiramdam na may naambag

sa kapwa upang makapagdagdag ng búhay

- gregoriovbituinjr.

03.06.2025

* litratong kuha sa Blood Extraction Area ng Philippine Red Cross QC Chapter sa Farmer, Cubao, Marso 6, 2025

Unang 50,000 puntos sa kasaysayan ng NBA

UNANG 50,000 PUNTOS SA KASAYSAYAN NG NBA

si Lebron James ay lumikha ng kasaysayan

nang ikalimampung libong puntos ay nagawa

sa isports na basketbol na kanyang larangan

na ikinatuwa ng mga tagahanga

nangyari iyon sa laban ng Los Angeles

Lakers kontra New Orleans Pelicans na tambak

ng higit dalawampung iskor, na mabilis

ang katunggali'y sa alikabok sinadlak

nilampasan niya si Kareem Abdul Jabbar

na puntos ay tatlumpu't walong libong higit

kay Lebron James naman ay matinding paandar

na unang limampung libong syut ay nakamit

pagpupugay kay Lebron James sa nakamit niya

sa NBA regular season pa talaga

- gregoriovbituinjr.

03.06.2025

* NBA - National Basketball Association

* ulat mula sa pahayagang Bulgar at Pilipino Star Ngayon, Marso 6, 2025

Isa nang alamat si Rubilen Amit

ISA NANG ALAMAT SI RUBILEN AMIT

tulad ni Efren "Bata" Reyes si Rubilen Amit

sa pandaigdigang kumpetisyon nakapagkamit

ng koronang naipagwagi sa labanang gitgit

at nakilala na ang husay niya't takong bitbit

nasungkit ni world billiard champion Amit ang korona

ng Women Challenge of Champions sa Las Vegas, Nevada

na patunay sa husay ng atletang Pilipina

premyong labinlimang libong dolyar ay nakamit pa

tulad ni Efren, si Amit ay isa nang alamat

na mga ipinakita'y sadyang nakagugulat

sa ambag sa bilyar, taospusong pasasalamat

at pangalan ng ating bansa'y muling iniangat

sa iyo, Rubilen Amit, mabuhay ka! MABUHAY!

makatang ito sa iyo'y talagang nagpupugay!

* ulat mula sa pahayagang Bulgar, Pebrero 27, 2025, p.12, at pahayagang Pilipino Star Ngayon, Marso 2, 2025, P.12

Ang dapat maluklok

ANG DAPAT MALUKLOK

katatapos lang ng bayan sa paggunitâ

sa anibersaryo ng Pag-aalsang Edsa

isang aral na nakita ko'y maging handâ

kung sakali mang mag-alsa muli ang masa

napagnilayan ko ang uring manggagawà,

maralita, kababaihan, magsasaka

mga inang dahil sa tokhang lumuluhà

ay, paano ba babaguhin ang sistema

kung ang Pag-aalsang Edsa'y muling mangyari

dapat dahil sa pagbabagong ating mithi

dahil ang mapagsamantala't mapang-api

ay dapat mawala't di na makapaghari

wasto lang na tunguhin nati'y tamang landas

kung saan wawakasan ang sistemang bulok

itatag natin ang isang lipunang patas

at mula uring manggagawa ang iluklok

- gregoriovbituinjr.

03.06.2025

Maaliwalas na umaga

MAALIWALAS NA UMAGA

maaliwalas ang umaga

na nagbibigay ng pag-asa

upang nagdaralitang masa

ay patuloy na makibaka

nang asam na hustisya'y kamtin

na iyon ang pangarap man din

na pati presyo ng bilihin

ay tuluyan nang pababain

ang umaga'y maaliwalas

na tanda ng magandang bukas

at tumungo sa nilalandas

na asam na lipunang patas

hayo, magpatuloy sa layon

dukha't obrero'y magsibangon

tuparin ang yakap na misyon

nang bagong sistema'y matunton

- gregoriovbituinjr.

03.05.2025

Suot ang bota kapag namatay

SUOT ANG BOTA KAPAG NAMATAY

kung sakali mang ako'y matsugi

nais kong tangan pa rin ang mithi

na magwagi ang mga kauri

na baguhin ang sistemang imbi

di ang mamatay sa katandaan

di ang maratay sa karamdaman

mas nais kong mamatay sa laban

tungong pagbabago ng lipunan

may isang popular na idiom

sabi'y "I'd like to die with my boots on."

iyan din ang aking nasa't layon

hanggang maipagwagi ang misyon

mamatay sa misyon ay kaytamis

isang halimbawa ay kaparis

ng pagkapaslang kay Archimedes

na isang mathematician sa Greece

ito ako, karaniwang tao

kapiling ng masa at obrero

tagumpay sana'y masilayan ko

habang naririto pa sa mundo

- gregoriovbituinjr.

03.05.2025

* mula sa Wikipedia: "To "Die with your boots on" is an idiom referring to dying while fighting or to die while actively occupied/employed/working or in the middle of some action. A person who dies with their boots on keeps working to the end, as in "He'll never quit—he'll die with his boots on." The implication here is that they die while living their life as usual, and not of old age and being bedridden with illness, infirmity, etc."

https://en.wikipedia.org/wiki/Die_with_your_boots_on

Ayaw isuko ang 'Bataan'

AYAW ISUKO ANG 'BATAAN'

isang metapora yaong nabasa naman

pananalitang nangyari sa kasaysayan

nasa pamagat ng ulat sa pahayagan:

sabi'y "Arvin ayaw pa isuko Bataan"

panahon noon ng pananakop ng Hapon

nang Bataan ay bumagsak sa mga iyon

naiba naman ang paggamit nito ngayon

ginamit sa basketbol ang salitang yaon

sa unang tatlong laro'y pulos sila talo

ngunit umaasa si Arvin Tolentino

ng Batang Pier sila rin ay mananalo

ayaw isuko ang 'Bataan' ay positibo

hanggang ngayon, Bataan ay huwag isuko

taga-Bataan man at Pinoy, di susuko

lalabanan ang mananakop at hunyango

itataguyod ang laya saanmang dako

- gregoriovbituinjr.

03.04.2025

* batay sa ulat sa pahayagang Abante, Marso 4, 2025, p.8

Tinuhog kaya bali ang pakpak

TINUHOG KAYA BALI ANG PAKPAK

matitinding pamagat sa mga balita

sa volleyball, kaytindi ng paglalarawan:

"Tin, Lady Tams tinuhog Eagles" ang ulat nga

at "Blue Eagles bali ang pakpak sa Lady Tams"

umuunlad na ang mga mamamahayag

sa pananalita nilang may metapora

kakaiba na ang kanilang pagbubunyag

tila sila'y makata sa literatura

Lady Tamaraws ang volleybelles ng FEU

ang tamaraw yaong may sungay na pantuhog

Lady Blue Eagles nama'y volleybelles ng AdMU

ang agila kung lumipad ay anong tayog

paglalarawang ito'y pang-agaw atensyon

kaya balita nila'y kaysarap basahin

na pumupukaw sa ating imahinasyon

pag-uulat nila'y tutunghayan na natin

- gregoriovbituinjr.

03.04.2025

* FEU - Far Eastern University

* AdMU - Ateneo de Manila University

* "Tin, Lady Tams tinuhog Eagles" mula sa pahayagang Abante Tonite, Marso 3, 2025, p. 8

* "Blue Eagles bali ang pakpak sa Lady Tams" mula sa pahayagang Pang-Masa, Marso 3, 2025, p. 8

Sa pagtatagumpay

SA PAGTATAGUMPAY

maraming dapat gawin upang magtagumpay

sa ating buhay, sa bahay, sa hanapbuhay

anumang suliranin ang nakabalatay

ay malalampasan kapag tayo'y nagsikhay

ang buhay nati'y di pulos laban at galit

dahil sa mga karapatang pinagkait

dahil binubusabos na ang maliliit

kundi mayroon ding panahon ng pag-awit

buhay ay punong-puno ng pakikibaka

lalo na't hanap ay panlipunang hustisya

paano wakasan ang mga dinastiya

na isang dahilan ng bulok na sistema

magtatagumpay lang tayo sa minimithi

kung sama-samang kikilos ang ating uri

upang wakasan na ang sangkaterbang hikbi

dahil sa kagagawan ng kuhila't imbi

- gregoriovbituinjr.

03.03.2025

Esensya

ESENSYA

matagal ko nang itinakwil ang sarili

upang sa uri at sa bayan ay magsilbi

lalo na't ayokong maging makasarili

sapagkat buhay iyong di kawili-wili

mabuti pa ngang magsilbi tayo sa masa

magsilbi sa maliliit, di sa burgesya

labanan ang mga kuhila't dinastiya

kahulugan ng buhay ay doon nakita

esensya ng buhay tuwina'y nalilirip

kapiling ng masa't dukhang dapat masagip

mula sa hirap, ginhawa ba'y panaginip?

tibak na tulad ko'y kayraming nasa isip

uring manggagawa, hukbong mapagpalaya

ang laging isinisigaw ng aking diwa

manggagawa't magsasaka ang mapagpala

na sana'y magtagumpay sa inaadhika

- gregoriovbituinjr.

03.03.2025

Pipino at mansanas

PIPINO AT MANSANAS

iyon lang ang pananghalian niya

pipino at mansanas lang talaga

istabilidad ay hinahanap pa

kung anong wastong pagkain sa kanya

kaytagal, hanggang ngayon hinahanap

kung anong sanhi ng sakit at hirap

tatlong testing na, wala pa ring ganap

ang mga doktor na'y nagsusumikap

doon sa ospital na mamahalin

sanhi'y di pa batid, ano ang lihim

ng sakit na nagpahirap pa man din

sa kabila ng milyong tumaginting

kinain niya'y pipino't mansanas

baka maibsan ang sakit na danas

baka ito ang kailangang lunas

baka... baka?! baka siya'y lumakas

- gregoriovbituinjr.

03.02.2025

Ang nanilay

ANG NANILAY

sa totoo lang ay nais kong huwag nang magising

at masaksihan ang pamimilipit mo sa sakit

ang pinapangarap ko'y tuluyan ka nang gumaling

mawala na ang tuwi-tuwina'y pamimilipit

apektado na rin ang buo kong pangangatawan

na binabalewala ko lang, inuuna kita

nawa'y lumakas ka na't bumuti ang kalusugan

nais kong mawala na ang sakit mong dinurusa

sa ngayon, nilalakasan ko lang ang aking loob

puso ko ma'y lumuluha dahil sa iyong lagay

sa mga gawain man at trabaho, ako'y subsob

naririto pa rin akong sa iyo'y nagbabantay

habang may buhay, may pag-asa, anang matatanda

na payo at gabay sa matagal na pagtalunton

sa daigdig na puno ng talahib na sariwa

upang kumilos pa rin at tuluyang makabangon

- gregoriovbituinjr.

03.01.2025

Ang pinutol na puno sa EDSA

ANG PINUTOL NA PUNO SA EDSA

naraanan ko'y isang putol na puno sa EDSA

na napapalibutan ng semento sa bangketa

ano kaya ang kwento sa likod ng kwento nito?

ang puno kayang pinutol dito'y ginawang troso?

kung nilipat naman ang puno ay saan nalipat?

subalit hindi, pagkat naiwan doon ang ugat!

balewala na lang siya sa mga nagdaraan

o baka makatisod, sanhi ng kapahamakan...

marahil, mayroong kasaysayan doong natago

na hindi ko alam kung atin pa bang mahahango

naging saksi ba sa himagsikan ang punong iyon?

ng mga Katipunero o panahon ng Hapon?

sakaling punong iyon ay makapagsasalita

ay kayrami nang kwento ang ating maitatala

bakas na lamang niya yaong naiwan sa atin

ugat na pinanatili't anong pamanang angkin?

- gregoriovbituinjr.

03.01.2025

Ang mensahe sa plakard

ANG MENSAHE SA PLAKARD

nakunan ko'y isang mahalagang mensahe

sa anibersaryo ng pag-aalsang Edsa

"Marcos-Duterte Panagutin!" yaong sabi

at "Baguhin ang sistema, hindi ang klima!"

sa nakasaad sa plakard ako'y sang-ayon

na ginawang gatasan ang kaban ng bayan

pinakamasahol na badyet ngayong taon

higit sangmilyon sang-araw ang ginastusan

di mapigil ng dinastiyang pulitikal

ang pagtaas ng presyo ng mga bilihin

tinig ng taumbayan na'y gumagaralgal

nais nilang sistemang bulok na'y putulin

tatlong bente pesos na ang kilo ng bigas

mabuti't UniThieves na'y nagkawatak-watak

dapat mahalal na pinuno'y yaong patas

upang taumbaya'y di gumapang sa lusak

- gregoriovbituinjr.

03.01.2025

* litratong kuha ng makatang gala noong 02.25.2025 sa Edsa Shrine kasabay ng ika-39 anibersaryo ng Unang Pag-aalsang Edsa

Ang panulat

ANG PANULAT

pluma ko'y di hihinto

sa panitikang tanto

saknungan ay binuo

mula danas sa mundo

pluma ko'y di titigil

tadtad man ng hilahil

magsalita ma'y garil

o kaya'y nanggigigil

laging magsisiwalat

ng anumang naungkat

upang ang nagsasalat

ay sakaling mamulat

matamis ang salita

maasim ang sikmura

buhay man ay mapakla

patuloy sa pagkatha

- gregoriovbituinjr.

03.01.2025

Pagkakalat at paglilinis

PAGKAKALAT AT PAGLILINIS

nasita ang isa ngunit matindi ang kanilang sagutan

na paksa'y hinggil sa pagkakalat sa ating kapaligiran:

"Tapon ka nang tapon ng basura sa kalsada. Ano ka ba?"

"Hello! Nasa Pilipinas pa tayo. Ano ini-expect mo?"

ang isa'y batid kung bakit di dapat magkalat sa kalsada

subalit isa'y siniraan na ang sariling bansa niya

di ba't nagsisikap tayong bansa'y maging maganda sa mata

subalit marami pa rin talaga ang walang disiplina

kaya pagsikapan pa nating maging malinis ang paligid

sapagkat nais nating may mensaheng maaya tayong hatid

na kalinisan ng paligid ay dapat nating mapabatid

gawin natin ang dapat bagamat minsan tayo'y nauumid

- gregoriovbituinjr.

02.28.2025

* batay sa komiks mula sa pahayagang Bulgar, Pebrero 20, 2025, p. 4

Hila mo, hinto ko, sa tamang babaan

HILA MO, HINTO KO, SA TAMANG BABAAN

ilang beses ko nang / nababasa iyon

'Hila mo, hinto ko, / sa tamang babaan'

sintunog ng isang / kasabihan noon

'Buntot mo, hila mo' / sa aklat nalaman

madalas mabasa / sa nasasakyang dyip

bilin nilang iyon, / hilahin ang tali

kung nais pumara / at umibis ng dyip

kung sa pupuntahan / ay nagmamadali

mayroong iilaw / sa tabi ng drayber

o kaya'y tutunog / pag tali'y hinatak

pag nakita iyon / o dinig ng tsuper

agad nang titigil / kahit sa malubak

noon, sisigaw lang: / 'Sa tabi lang. Para!'

paano kung bingi / ang drayber na ito?

sinasanay tayo / sa teknolohiya

paunti-unti man / at di pa moderno

- gregoriovbituinjr.

02.28.2025

Pagpapa-riso ng polyeto

PAGPAPA-RISO NG POLYETO

minsan, kailangan ding bumunot sa bulsa

pag naubusan na ng pamigay sa masa

upang ipagpatuloy ang pangangampanya

sa kandidatong prinsipyado't makamasa

dalawang kandidatong pag-asa ng bayan

matitinding kalaban ng katiwalian

kakampi ng manggagawa, di ng mayaman

kasangga ng maralita, di ng gahaman

Ka Leody de Guzman at Luke Espiritu

ang ating pambato sa loob ng Senado

dapat natin silang ikampanya ng todo

ang kanilang plataporma'y nasa polyeto

ipabasa sa higit na nakararami

at ipaunawa ang kanilang mensahe:

huwag iboto ang political dynasty

sa Senado, boses ng masa, magsisilbi

kaya polyeto nila'y ipina-riso rin

nang madagdagan ang ipamimigay namin

buti't may salaping sa bulsa'y bubunutin

upang sa pangangampanya'y di kukulangin

- gregoriovbituinjr.

02.28.2025

Bagong higaan ni Alaga

BAGONG HIGAAN NI ALAGA

ibinili ni misis ng higaan

si Alaga upang maging maalwan

ang kanyang pagtulog at pahingahan

at di sa sahig, o kung saan-saan

may kaskasan na rin ng kuko niya

pagkat may kalmot na ang mga sopa

may kama na siya, may kaskasan pa

kaya ibinigay iyon sa kanya

isinilang siya sa aming bahay

dalawang Abril na'y nagdaang tunay

magaling manilâ, tulad ng nanay

maabilidad, talagang mahusay

isang ngiyaw lang, karipas ang daga

pati mga bubuwit, nangawala

isang hunter pa naman si Alaga

talagang hanap lagi'y mga daga

salamat, Alaga, at naririto

sa bahay, naglalambing kang totoo

kaya bigyan ka lang ng kama'y wasto

at may pagkain pang laan sa iyo

- gregoriovbituinjr.

02.27.2025

* mapapanood ang bidyo sa kawing na: https://fb.watch/x-yY1j25PT/ 

Simpatya sa asong si TikTok

SIMPATYA SA ASONG SI TIKTOK

I

di lang ako political activist

di rin lang ako human rights activist

isa ring environmental activist

ako rin ay animal rights activist

kaya ninais kong mag-vegetarian

ngunit na-COVID noong kasagsagan

ng pandemya, at ako'y pinayuhan

ng ninang na ito muna'y tigilan

para sa protina, magkarne ako

kaya ang payo niya'y sinunod ko

bagamat paminsan-minsan lang ito

ngunit madalas, isda't gulay ako

II

hayskul ako'y nakasama sa dula

pamagat ay Brother Sun, Sister Moon nga

lahat ng buhay dapat makalinga

yaong aral ni St. Francis sa madla

kaya masakit na mabalitaan

isang aso'y napagtripan ninuman

limang pana'y pinatagos sa laman

ay, kawawa ang kanyang kalagayan

dahil ba ngalan ng aso ay TikTok

kaya napagtripan ng mga bugok?

ang ginawa nila'y gawaing bulok

at talaga namang di ko malunok

may karapatan din ang mga aso

na dapat ipagtanggol din ng tao

bilang animal rights activist ako

ay dapat managot ang mga loko

III

inaamin ko, nakapatay ako

noon ng manok sa palad ko mismo

pagtirik ng mata'y nasaksihan ko

nakonsensya, ayaw ulitin ito

noong ako'y bata, aso'y pinatay

ng lasenggero't nasaksihang tunay

niluto't pinulutan nilang tambay

tanda ko iyon, di na napalagay

tumagos nga ang aral ni St. Francis

kaya di ko mapatay kahit ipis

ako na nga'y animal rights activist

na sa buhay ay di dapat magmintis

- gregoriovbituinjr.

02.27.2025

* ulat mula sa GMA News, 02.26.2025

* mababasa ang ulat sa mga sumusunod na kawing:

https://www.facebook.com/photo/?fbid=1097427535762236&set=pcb.1097427715762218  

https://www.gmanetwork.com/news/balitambayan/promdi/937495/aso-iginapos-at-tinadtad-ng-pana-sa-katawan-sa-negros/story/

https://www.facebook.com/photo/?fbid=1097537992417857&set=a.649184583919869

Nilay sa pagbaka

NILAY SA PAGBAKA

nanilay ko bawat pakikibaka

bakit dapat baguhin ang sistema?

bakit igagalang ng bawat isa

ang pagkatao't dignidad ng kapwa?

ano ba ang pantaong karapatan?

ano iyang hustisyang panlipunan?

bakit mga ito'y ipaglalaban?

bakit ba pagbabago'y ating asam?

nakatingala muli sa kisame

habang may minumuni sa kukote

ano ang ating adhika't mensahe?

sa mundong sangkatutak ang salbahe?

pagbabago ng sistema'y di biro

kahit madalas ako'y hapong-hapo

tuloy ang pagkilos ng buong puso

nang lipunang makatao'y matayo

- gregoriovbituinjr.

02.26.2025

Isang aral ng Edsa ang sama-samang pagkilos

ISANG ARAL NG EDSA ANG SAMA-SAMANG PAGKILOS

buhay ang sama-samang pagkilos ng sambayanan

buhay ang Edsa sa atin, sa diwa't kalooban

aral ng sama-samang pagkilos ay kailangan

upang mabago ang bulok na sistema't lipunan

sobra na ang pamumuno ng burgesyang kuhila

wakasan ang dinastiyang pulitikal sa bansa

asahan na natin ang alternatibo ng madla

ang uring manggagawa, ang hukbong mapagpalaya

isang aral ng Edsa ang sama-samang pagkilos

ng magkakauri upang kabuluka'y matapos

wakasan ang pagsasamantala't pambubusabos

ng mga elitista sa uring naghihikahos

wakasan ang pamamayagpag ng oligarkiya,

ng kapitalista, ng asendero, elitista

O, Bayan ko, wakasan na ang bulok na sistema!

at sama-samang itayo ang gobyerno ng masa!

- gregoriovbituinjr.

02.25.2025

* litratong kuha malapit sa People Power Monument habang ginugunita ang ika-39 na anibersaryo ng Unang Pag-aalsang Edsa

Pagbigkas ng tula sa People Power Monument

PAGBIGKAS NG TULA SA PEOPLE POWER MONUMENT

Ikalima ng hapon, sa harap ng People Power Monument, kasabay ng pagkilos ng mamamayan sa paggunita sa ika-39 na anibersaryo ng Unang Pag-aalsang Edsa, Pebrero 25,  2025, ay nag-bidyo-selfie ang makatang gala sa pagbigkas ng kanyang inihandang tula:

POSITIBO'T NEGATIBONG ARAL NG EDSA 1986

kasama ko si Dad sa unang pag-aalsang Edsa

pati na mga tagasimbahang kagrupo niya

dinala'y laksang pandesal na pinamigay nila

sa makitang tao sa Edsa na nakikiisa

iyon nga'y malaking kaganapan sa kasaysayan

na kung ating aaralin ay sadyang katunayan

na kung magkakaisa talaga ang mamamayan

kayang magpatalsik ng diktador sa ating bayan

sa panahong iyon, talagang masaya ang madla

subalit nang lumayas na ang diktador sa bansa

ang sabi'y pangako ng Edsa'y tuluyang nawala

sa gobyerno'y di nakapwesto ang obrero't dukha

pag-aalsa iyong buong mundo na ang pumuri

ngunit pumalit, mula rin sa naghaharing uri

kaya di pa rin natupad ang pangarap na mithi

palitan ang bulok na sistemang kamuhi-muhi

isa iyong malaking aral na dapat manilay

sa sama-samang pagkilos ay kakayaning tunay

na baguhin ang sistema't makamit ang tagumpay

huwag lang sa di kauri ang panalo'y ibigay

- gregoriovbituinjr.

02.25.2025

* mapapanood ang bidyo sa kawing na: https://fb.watch/xZmFIKOOOx/

Positibo't negatibong aral ng EDSA 1986

POSITIBO'T NEGATIBONG ARAL NG EDSA 1986

kasama ko si Dad sa unang pag-aalsang Edsa

pati na mga tagasimbahang kagrupo niya

dinala'y laksang pandesal na pinamigay nila

sa makitang tao sa Edsa na nakikiisa

iyon nga'y malaking kaganapan sa kasaysayan

na kung ating aaralin ay sadyang katunayan

na kung magkakaisa talaga ang mamamayan

kayang magpatalsik ng diktador sa ating bayan

sa panahong iyon, talagang masaya ang madla

subalit nang lumayas na ang diktador sa bansa

ang sabi'y pangako ng Edsa'y tuluyang nawala

sa gobyerno'y di nakapwesto ang obrero't dukha

pag-aalsa iyong buong mundo na ang pumuri

ngunit pumalit, mula rin sa naghaharing uri

kaya di pa rin natupad ang pangarap na mithi

palitan ang bulok na sistemang kamuhi-muhi

isa iyong malaking aral na dapat manilay

sa sama-samang pagkilos ay kakayaning tunay

na baguhin ang sistema't makamit ang tagumpay

huwag lang sa di kauri ang panalo'y ibigay

- gregoriovbituinjr.

02.25.2025

* litrato mula sa google

P5 dagdag pasahe sa dyip, grabe

P5 DAGDAG PASAHE SA DYIP, GRABE

tataas ang pamasahe

di tumataas ang sahod

makikinabang ang tsuper

dagdag-hirap sa komyuter

ang limang piso'y di barya

lalo't mahirap ang tao

na sadyang pinagkakasya

ang kakarampot na sweldo

kauna-unawa naman

na ang pagtaas ng presyo

ng langis at gasolina

ay sadyang di mapigilan

may Oil Deregulation Law

na bahala ang negosyo

kaya pagtaas ng presyo

di mapigil ng gobyerno

nagtataasan ang lahat

maliban sa sahod nila

kailan ba mamumulat

na baguhin ang sistema

- gregoriovbituinjr.

02.24.2025

* ulat mula sa pahayagang Bulgar, Pebrero 20, 2025, tampok na balita (headline) at pahina 2

Nilagang daing na tuyo

NILAGANG DAING NA TUYO

imbes prituhin, aking inilaga

ang ilang nabiling daing na tuyo

wala namang problema sa hinanda

ang mahalaga lang, ito'y maluto

mula sa karaniwang pagpiprito

ng tuyong daing, iniba ko naman

tingin mo man, ito'y eksperimento

ngunit sagad sa buto ang linamnam

imbes mantika, ginamit ko'y tubig

tila isda'y ibinalik sa ilog

subalit sadyang malasa sa bibig

pananghalian ko'y nakabubusog

- gregoriovbituinjr.

02.24.2025

Kawawa naman ang buwaya

KAWAWA NAMAN ANG BUWAYA

kawawa naman ang buwaya

sa tusong trapo iginaya

dahil ba sa kapal ng balat

o pangil, kaytinding kumagat

buwaya'y tawag sa tiwali

lalo't trapo'y tengang kawali

sa hirap at dusa ng dukha

sa bayan ay walang ginawa

nakatanghod lamang sa kaban

ng bayan ang nanunungkulan

imbes sa masa kumakampi

ay sa burgesya nagsisilbi

kabang bayan ang nasa isip

pati alagad nilang sipsip

buwaya'y kawawang totoo

pagkat itinulad sa trapo

- gregoriovbituinjr.

02.24.2025

* batay sa komiks na Bugoy sa pahayagang Pang-Masa, Pebrero 23, 2025, p.7

Naibalik ang nawawala

NAIBALIK ANG NAWAWALA

sa nagpi-print, taospusong pasasalamat

naiwang USB ay nabalik ngang sukat

akala ko'y nawaglit na ang mga ulat

akala ko'y nawala na ang mga sulat

nagninilay ako't may bagong sinaliksik

tinunghayan ko ang naroong natititik

na nais kong ma-print agad sa pananabik

mga bagong leksyong sa utak isisiksik

at dinukot ko ang USB sa pitaka

nawawala, di ko na makita, lagot na

mabuti na lamang at aking naalala

baka nasa printing shop, babalikan ko pa

makalilimutin na ang tulad kong gurang

na nasa mahigit limampung taong gulang

sana, USB ay di nawalang tuluyan

nabalikan ko lang iyon kinabukasan

kung nawala, bagong USB ay bibilhin

natutulala ako't dagdag na gastusin

sa printing shop, naibalik iyon sa akin

at ang pasasalamat ko'y tumataginting

- gregoriovbituinjr.

02.23.2025

Pagtula'y pahinga sa laksang suliranin

PAGTULA'Y PAHINGA SA LAKSANG SULIRANIN

pagtula'y pahinga sa laksang suliranin

nire-relaks ang utak ang tanang layunin

tutula muna sa dami ng lulutasin

yaong iba naman, yosi na'y hihithitin

bago matulog o paggising, nagninilay

problemang sala-salabid ang nakahanay

mga nalilirip animo'y naghihintay

mapapatula nang loob ay mapalagay

naglalaba man o nagluluto, may tula

nasa tahanan man, sa lansangan o baha

nakangiti sa labas, sa loob ay luha

maaliwalas ang mukha ngunit balisa

nasa lungsod man, tila ako'y nasa liblib

kayrami mang ahas na sadyang mapanganib

tanging nagagawa'y ang tibayan ang dibdib

sa kaharap mang trapo't halimaw ay tigib

- gregoriovbituinjr.

02.23.2025

Ikatlong kampyonato, nakuha ni Django

IKATLONG KAMPYONATO, NAKUHA NI DJANGO

ngayong taon nga'y tatlong beses nang nagkampyon

sa larong bilyar si Francisco Bustamante

mabuhay ka, Django, sa nakamit mong iyon

mahigit sandaang katunggali'y nadale

unang panalo'y Bayou State Classic One-Ball

One Pocket sa Louisiana, ang sunod ay

sa Las Vegas, sa Jay Swanson Memorial Nine-ball

ikatlo'y sa One Pocket Face-Off nagtagumpay

Congrats, Django, sa binigay mong karangalan

sa bansa, tulad ng kumpare mong si Efren

"Bata" Reyes, na ang taguri'y "The Magician"

kahusayan ninyo'y dapat naming tanghalin

taasnoong pagpupugay sa iyo, Django

hari ka ng bilyar at tunay na idolo

- gregoriovbituinjr.

02.23.2025

* ulat mula sa pahayagang Bulgar, Pebrero 23, 2025, p.12

Tatawirin ko kahit pitong bundok

TATAWIRIN KO KAHIT PITONG BUNDOK

tatawirin ko kahit pitong bundok

upang sa sinta'y mapatunayan ko

na siya ang sa puso'y tinitibok

nang tamaan ng pana ni Kupido

tatawirin ko kahit pitong bundok

upang patunayan lamang sa masa

na nagsisikap abutin ang tuktok

na kakamtin din nila ang hustisya

tatawirin ko kahit pitong bundok

bilang patunay sa obrero't dukha

na sila'y totoong lider na subok

na magbabago sa takbo ng bansa

tatawirin ko kahit pitong bundok

upang sa kababaihan patunay

na aking madalas na naaarok

sila'y pawang lider na mahuhusay

tatawirin ko kahit pitong bundok

upang patunayan sa mga api

na sila'y di lagi na lang yukayok

kundi giginhawa rin at bubuti

tatawirin ko kahit pitong bundok

na sistemang bulok pala'y titirik

kung sama-sama nating matatarok

na kailangan palang maghimagsik

- gregoriovbituinjr.

02.23.2025

Look Forward tayo kay Attorney Luke

Look Forward tayo kay Attorney Luke

Lider-manggagawa siyang subok

Sa Senado ay ating iluklok

Lalo 't sistema'y di na malunok

Iboto natin, Luke Espiritu

Na dapat maupo sa Senado

Siya ang kailangan, Bayan ko

Tungo sa tunay na pagbabago!

- gregoriovbituinjr.

02.22.2025

* mapapanood ang bidyo sa kawing na: https://fb.watch/xVuJe1tdSQ/

Dahil sa political dynasty

Dahil sa political dynasty 

Trapo sa masa'y di nagsisilbi

Pulos ayuda lang sa kakampi

Upang mabago ang nangyayari

Iboto natin si Ka Leody

Para Senador ng ating bansa 

Tiyak na siya'y may magagawa 

Sa isyu ng manggagawa 't dukha

Iboto ang Senador ng madla

Si Ka Leody de Guzman na nga!

- gregoriovbituinjr.

02.22.2025

* mapapanood ang bidyo sa kawing na: https://fb.watch/xVoYOxfcWS/ 

Ang mga nalilirip

ANG MGA NALILIRIP

iniisip ko pa ring kumatha

ng nobelang tatatak sa madla

inspirasyon ang danas ng dukha

upang sa hirap ay makalaya

nagsasalimbayan ang nalirip

na paksang umaalon sa isip

pati mga isyung halukipkip

upang masa sa dusa'y masagip

bawat pagkatha'y di isusuko

kahit ang nadarama'y siphayo

pinangarap sana'y di gumuho

at ang asam na akda'y mabuo

nawa'y masimulan at matapos

ang nobela hinggil sa hikahos

wakasan na ang pambubusabos

ng sistemang sa dibdib umulos

- gregoriovbituinjr.

02.21.2025

Nang-hostage dahil di ibinigay ang sahod

NANG-HOSTAGE DAHIL DI IBINIGAY ANG SAHOD

grabeng isyu itong dapat mabigyang pansin

hinggil sa isang obrerong kayod ng kayod

binalewala siya ng amo pa man din

kaya nang-hostage nang di binigay ang sahod

bakit ba isyu'y pinaabot pa sa ganyan

kaytindi ngang ulat kung iyong mababasa

ang kanyang lakas-paggawa'y ayaw bayaran

ng employer niyang tila ganid talaga

hinabol pa siya ng kapwa empleyado

upang pagtulungan, upang siya'y itaboy

doon humingi ng tulong ang kanyang amo

di malaman ang gagawin, nang-hostage tuloy

hanggang mga pulis na ang nakipag-usap

na nag-ambagan nang sahod niya'y mabuo

manggagawang di binayaran, di nilingap

ay napiit na't nag-sorry nang buong puso

sahod naman niya ang kinukuhang tiyak

upang kanyang pamilya'y di naman magutom

hinihingi niya'y para sa mga anak

komento ko lang sa isyu'y kamaong kuyom

- gregoriovbituinjr.

02.20.2025

* ulat mula sa pahayagang Tempo, Pebrero 20, 2025, p.5

February 20 - World Day of Social Justice

PEBRERO 20 - WORLD DAY OF SOCIAL JUSTICE

dapat may hustisya para sa lahat

para sa makataong komunidad

at para sa buhay na may dignidad

para ang ating bansa'y may pag-unlad

Pebrero a-Bente, Pandaigdigang

Araw ng Katarungang Panlipunan

isang araw na nararapat lamang

alalalahanin nating mamamayan

tulad nito ang mahalagang isyu

ng Araw ng Karapatang Pantao

hustisya'y dapat makamit ng tao

lalo yaong mga naagrabyado

wakasan na ang pagsasamantala

ng ilan sa nakararaming masa

ipaglaban, panlipunang hustisya

at baguhin ang bulok na sistema

- gregoriovbituinjr.

02.20.2025

Ang makatang Percy Bysshe Shelley

ANG MAKATANG PERCY BYSSHE SHELLEY

hanga rin ako sa makatang Percy Bysshe Shelley

pagkat siya'y makatang radikal na masasabi

mithi kong tula niya'y isalin sa ating wika

upang mga katha niya'y mabasa rin ng madla

may nakita akong aklat siya ang tinalakay

di pa mahiram sa opis na pinuntahang tunay

radikal mag-isip lalo't itinaguyod naman

pantay na pamamahagi ng yaman sa lipunan

ang kanyang aktibismo't mga akdang pulitikal

ay mababasa kung gaano siya ka-radikal

napagnilayan din niya noon ang Rebolusyong 

Pranses, pati na ang pamumuno ni Napoleon

sumuporta sa himagsik laban sa monarkiya

sa Espanya, pati nang mga Griyego'y mag-alsa

laban sa imperyong Ottoman, makatang idolo

na itinuturing na sosyalista katulad ko 

sana'y mahiram ko't mabasa ang libro sa opis

na sana'y di anayin o kainin lang ng ipis

mahalagang talambuhay niya'y aking manamnam

inspirasyon siya kaya libro'y nais mahiram

- gregoriovbituinjr.

02.19.2025

Huwag nang iluklok ang walang nagawa

HUWAG NANG ILUKLOK ANG WALANG NAGAWA

wala raw nagawa ang kapitan

ang puna ng isang mamamayan

nais ng anak pumalit dito

pag natapos na raw ang termino

simpleng puna lang ng Mambubulgar

katotohanang nakakaasar

ganito'y hahayaan lang natin?

sila pa ba ang pananalunin?

tila komiks ay nagpapatawa

ngunit hindi, komiks ay konsensya

ng bayan at mga naghihirap

dahil nakaupo'y mapagpanggap

pangako, bayan daw ay uunlad

subalit progreso'y anong kupad

matuto na tayo, O, Bayan ko

huwag nang iluklok iyang trapo

- gregoriovbituinjr.

02.18.2025

* mula sa pahayagang Bulgar, 02.18.2025, p.4

Balaw

BALAW

bagong salita sa akin bagamat luma

na nasa palaisipan: Walo Pababa

tanong: ilaw o sulo para sa taong nasa

madilim na landas, sagot ay BALAW pala

ang "nasa madilim na landas" ba'y karimlan?

kaya balaw yaong gagamiting ilawan

o iyon ay isang talinghagang nawatas

na nangangahulugang "naligaw ng landas"

balaw ba'y isang gabay, patnubay, o payo

upang naligaw ng landas ay mapanuto

paano iyon ginamit sa pangungusap?

"Sindihan ang balaw, karimlan na'y laganap"

dagdag kaalaman sa makatang tulad ko

na adhika'y gamitin sa tula ko't kwento

ang balaw ding ito sa akin ay nagmulat

upang tuntunin ang minulan ng alamat

- gregoriovbituinjr.

02.18.2025

* palaisipan sa pahayagang Bulgar, Pebrero 17, 2025, p.11